ఓట్ల తొలగింపు దరఖాస్తులపై పరిమితులు.. ఫామ్‌-7 దుర్వినియోగం నేపథ్యంలో ఈసీ నిర్ణయం

ఓటర్ల జాబితాల నుంచి పేర్లను అక్రమంగా తొలగించేందుకు పెద్ద ఎత్తున ఫామ్‌-7 దరఖాస్తులను సమర్పిస్తున్నారన్న ఫిర్యాదుల నేపథ్యంలో కేంద్ర ఎన్నికల సంఘం కీలక నిర్ణయం తీసుకుంది.

న్యూఢిల్లీ: ఓటర్ల జాబితాలో పేర్లను తొలగించాలని లేదా కొత్త పేర్ల చేరికపై అభ్యంతరం వ్యక్తం చేస్తూ, ఒక వ్యక్తి సమర్పించే దరఖాస్తుల సంఖ్యపై పరిమితులు విధించింది. దీని ప్రకారం ప్రత్యేక సవరణ (క్లెయిమ్‌లు, అభ్యంతరాలు) వ్యవధిలో ఒక వ్యక్తి గరిష్ఠంగా 10 ఫామ్‌-7 దరఖాస్తులు మాత్రమే దాఖలు చేసేందుకు అవకాశం ఉంటుంది.

అలాగే సాధారణ నిరంతర ప్రక్రియ సాగుతున్న సమయంలో నెలకు గరిష్ఠంగా 5 దరఖాస్తులు మాత్రమే సమర్పించేందుకు అనుమతినిస్తారు. అర్హులైన ఓటర్లు ఇబ్బంది పడకుండా చూడటంతో పాటు ఎన్నికల అధికారులపై అనవసర పనిభారాన్ని తగ్గించేందుకే ఈ నిబంధనలు తెచ్చినట్లు ఈసీ స్పష్టం చేసింది.