బెంగళూరు : అల్లారు ముద్దుగా పెంచుకుంటున్న ఓ చిలుక తప్పిపోయింది. దీంతో ఆ చిలుక యజమాని తీవ్ర ఆవేదన వ్యక్తం చేస్తున్నాడు. తప్పిపోయిన చిలుక ఆచూకీ చెప్తే రూ. 50 వేలు నజరానా ఇస్తానని ప్రకటన చేశాడు. చిలుక ఆచూకీ కోసం ఆ యజమాని కుటుంబం విస్తృతంగా గాలిస్తోంది.
కర్ణాటకలోని తుమకూరు జయనగర్ కాలనీకి చెందిన జంతు ప్రేమికుడు రవి.. ఆఫ్రికాకు చెందిన ఓ రెండు చిలుకలను పెంచుకుంటున్నాడు. ఈ రెండింటిలో ఒక చిలుక రుస్తుమా జులై 16వ తేదీన ఇంటి నుంచి అదృశ్యమైంది. చిలుక తప్పిపోవడంతో రవి తీవ్ర ఆవేదనకు లోనయ్యాడు. దాన్ని ఆచూకీ తెలుపాలని కోరుతూ.. పోస్టర్లను విడుదల చేసింది. చిలుక ఎక్కడైనా కనిపిస్తే తక్షణమే సమాచారం ఇవ్వాలని, వారికి రూ. 50 వేలు నజరానా ఇస్తామని పోస్టర్లలో పేర్కొన్నారు.
ఈ సందర్భంగా రవి మాట్లాడుతూ.. తప్పిపోయిన చిలుకతో తమ కుటుంబానికి ఎంతో అనుబంధం ఉందని పేర్కొన్నాడు. దాన్ని తీవ్రంగా మిస్ అవుతున్నామని తెలిపాడు. ఆ చిలుకతో గడిపిన సందర్భాలు గుర్తుకు వస్తుంటే ఎంతో బాధేస్తుందన్నాడు. ఇక ఆ రెండు చిలుకల పుట్టిన రోజు వేడుకలను ఆ కుటుంబం ఎంతో గొప్పగా నిర్వహిస్తుంది.