Covid Vaccine | అన్ని రకాల ప్రాణాంతక కరోనా వేరియంట్ల ఆట కట్టించేందుకు సమర్థవంతమైన వ్యాక్సిన్ తయారు చేయనున్నట్లు మన శాస్త్రవేత్తలు ప్రకటించారు. రెండేండ్ల క్రితం వెలుగు చూసిన కోవిడ్-19 మహమ్మారి ప్రపంచ మానవాళిని వణికించింది. అత్యంత ప్రమాదకర అంటువ్యాధి కోవిడ్-19 న్యూ వేరియంట్లతో దూసుకొస్తున్న తాజా వేవ్లతో పరిస్థితి విషమించకుండా చర్యలు తీసుకోవాల్సి ఉందని ఆ శాస్త్రవేత్తలు తెలిపారు. భవిష్యత్లో వచ్చే అన్ని రకాల కరోనా వేరియంట్ల నుంచి రక్షణ కోసం టీకా రూపొందించాలని కాజీ నజ్రూల్ యూనివర్సిటీ (అసాన్సోల్), ఇండియన్ ఇన్స్టిట్యూట్ ఆఫ్ సైన్స్ ఎడ్యుకేషన్ అండ్ రీసెర్చ్ (భువనేశ్వర్) సంస్థల శాస్తవ్రేతలు చెప్పారు.
పెప్టైడ్ అనే పేరుతో ఈ టీకా రూపొందించనున్నారు. ఇందులో రెండు కంటే ఎక్కువ అమైనో యాసిడ్స్ ఉంటాయి. వారు చేసిన పరిశోధన మాలిక్యూలర్ లిక్విడ్స్ జర్నల్లో ప్రచురితమైంది. సార్స్-కోవ్-2తోపాటు హెచ్-కోవ్-229ఈ, హెచ్-కోవ్-హెచ్కేయూ1, హెచ్కోవ్-ఓసీ 43, సార్స్ కోవ్, మెర్స్-కోవ్ వేరియంట్ల నుంచి రక్షణ కల్పించేలా ఈ వ్యాక్సిన్ రూపొందించారు. తాము డిజైన్ చేసిన టీకా అత్యంత సుస్థిరంగా, యాంటిజెనిక్గా, ఇమ్యూనైజిక్గా ఉంటుందని శాస్త్రవేత్తలు తెలిపారు. ఈ పరిశోధనలో కాజీ నజ్రూల్ యూనివర్సిటీకి చెందిన అభిగ్యాన్ చౌదరి, సుప్రభాత్ ముఖర్జీ, ఐఐఎస్ఈఆర్ నుంచి పార్థ్ సారథి సేన్ గుప్తా, సరోజ్ కుమార్ పాండా, మలాయ్ కుమార్ రాణా పాల్గొన్నారు.
కంప్యూటేషనల్ మెథడ్స్తో తమ టీం వ్యాక్సిన్ను డెవలప్చేసిందని అభిగ్యాన్ చౌదరి తెలిపారు. తదుపరి దశలో వ్యాక్సిన్ ఉత్పత్తి చేయడంతోపాటు టెస్టింగ్ ప్రక్రియకు వెళుతుందన్నారు. ఈ వ్యాక్సిన్ తరహాలో మరే టీకాకు కూడా ఒకేసారి కరోనా ఫ్యామిలీ వైరస్లను కట్టడి చేసే సామర్థ్యం ఉండదని చెప్పారు.