Visit:
చెన్నై: తమిళనాడు ముఖ్యమంత్రి విజయ్పై అభ్యంతరకరమైన, బెదిరింపు వ్యాఖ్యలు చేసిన డీఎంకే ఎమ్మెల్యే జీఆర్ మార్కండేయన్ను పోలీసులు అరెస్ట్ చేశారు. ఆయన అరెస్ట్కు నిరసనగా డీఎంకే కార్యకర్తలు, నేతలు ఆందోళన చేపట్టారు. (DMK MLA Arrested) జూలై 18న జరిగిన బహిరంగ సభలో డీఎంకే ఎమ్మెల్యే మార్కండేయన్ వివాదస్పద వ్యాఖ్యలు చేశారు. కొలత్తూర్ నియోజకవర్గంలో ఓడిన డీఎంకే అధ్యక్షుడు ఎం.కె. స్టాలిన్ను సీఎం విజయ్ పరోక్షంగా విమర్శించడంపై ఆయన స్పందించారు. ‘ముఖ్యమంత్రి తన తండ్రి కోసం వెతుకుతున్నానని అసెంబ్లీలో అంటున్నారు. సిగ్గులేని ముఖ్యమంత్రి. అసెంబ్లీలో మిమ్మల్ని మేం చూసుకుంటాం. అసెంబ్లీ తలుపులు మూసివేస్తానని ఆయన అంటున్నారు. ఒకవేళ ఆయన వాటిని మూసివేస్తే, ఆయన ఎముకలు విరిగిపోతాయి. అసెంబ్లీని మూసి చూడమనండి’ అని అన్నారు.
కాగా, సీఎం విజయ్కు పరువునష్టం కలిగించేలా, ఆయనను బెదిరించేలా డీఎంకే ఎమ్మెల్యే మార్కండేయన్ చేసిన ఈ వ్యాఖ్యలపై టీవీకే ప్రతినిధి ఫిర్యాదు చేశారు. ఈ నేపథ్యంలో ఆయనను పోలీసులు అరెస్ట్ చేశారు. టుటికోరిన్ ఎస్పీ కార్యాలయానికి తరలించి విచారిస్తున్నారు. డీఎంకే ఎమ్మెల్యే మార్కండేయన్ అరెస్ట్కు నిరసనగా డీఎంకే నేతలు, కార్యకర్తలు ఆందోళనకు దిగారు. పోలీస్ చర్యను ఖండిస్తూ నినాదాలు చేశారు.
మరోవైపు ఈ నెల ప్రారంభంలో ముఖ్యమంత్రి విజయ్పై వ్యాఖ్యలు చేసిన తిరుచెందూర్ డీఎంకే ఎమ్మెల్యే అనిత రాధాకృష్ణన్ను కూడా పోలీసులు అరెస్టు చేశారు. అయితే అదే రోజు బెయిల్పై విడుదలయ్యారు.
