లక్నో: నిత్యవసర వస్తువులు డెలివరీ కోసం వచ్చిన ఏజెంట్ ఇంట్లో ఒంటరిగా ఉన్న మహిళపై లైంగిక దాడికి పాల్పడ్డాడు. బాధితురాలి ఫిర్యాదుతో పోలీసులు నిందితుడి ఆచూకీ గుర్తించగా వారి నుంచి గన్ లాక్కొని పారిపోయాడు. ఈ నేపథ్యంలో సాయుధ పోలీస్ బలగాలను రప్పించి సెర్చ్ చేశారు. చివరకు నిందితుడి కాలుపై కాల్పులు జరిపి అరెస్ట్ చేశారు. ఉత్తరప్రదేశ్లోని గ్రేటర్ నోయిడాలో ఈ సంఘటన జరిగింది. శుక్రవారం ఒక అపార్ట్మెంట్లో ఉంటున్న మహిళ మొబైల్ యాప్ ద్వారా నిత్యవసరాలకు ఆర్డర్ చేసింది. 23 ఏళ్ల సుమిత్ సింగ్ ఆ సరుకులను డెలివరీ చేయడానికి ఆమె నివాసానికి వెళ్లాడు. అయితే ఆ మహిళ ఒంటరిగా ఉన్నట్లు గ్రహించి ఆమెపై అత్యాచారానికి పాల్పడ్డాడు. అనంతరం అక్కడి నుంచి పారిపోయాడు.
కాగా, బాధిత మహిళ వెంటనే పోలీసులకు ఫిర్యాదు చేసింది. దీంతో పోలీసులు రంగంలోకి దిగారు. నిందితుడి ఆచూకీ గుర్తించి అతడు ఉన్న ప్రాంతానికి చేరుకున్నారు. అయితే సుమిత్ ఒక పోలీస్ నుంచి గన్ లాక్కొని అక్కడి నుంచి తప్పించుకున్నాడు. ఈ నేపథ్యంలో సాయుధ ప్రతిస్పందన దళాలు, స్వాట్ను రప్పించి ఆ ప్రాంతంలో సెర్చ్ చేశారు.
మరోవైపు సాయుధ పోలీసులను చూసి నిందితుడు సుమిత్ సింగ్ వారిపై కాల్పులు జరిపేందుకు ప్రయత్నించాడు. దీంతో పోలీసులు అతడి కాలుపై కాల్పులు జరిపారు. గాయపడిన అతడ్ని అరెస్ట్ చేశారు. చికిత్స కోసం ప్రభుత్వ ఆసుపత్రికి తరలించారు. నిందితుడు సుమిత్ సింగ్ గతంలో కూడా అక్రమ మద్యం కేసులో అరెస్టైనట్లు పోలీస్ అధికారి వెల్లడించారు.