Visit:
డెహ్రాడూన్: ఉత్తరాఖండ్లో భారీ వర్షాలు పడే అవకాశాలు ఉన్నాయి. ఈ నేపథ్యంలో శని, ఆదివారం .. ఛార్ధామ్ యాత్ర(Char Dham Yatra)ను రద్దు చేశారు. భారతీయ వాతావరణ శాఖ ఆ రాష్ట్రంలోని పలు జిల్లాలకు రెడ్, ఆరెంజ్ అలర్ట్ జారీ చేసింది. ఘర్వాల్ కమీషనర్ ఆనంద్ స్వరూప్.. అన్ని జిల్లా మెజిస్ట్రేట్లకు లేఖను రిలీజ్ చేశారు. వాతావరణ శాఖ ఇచ్చిన నివేదిక ఆధారంగా, యాత్రికుల క్షేమం కోసం, ఛార్ధామ్ యాత్రను శని, ఆదివారాల్లో రద్దు చేస్తున్నట్లు పేర్కొన్నారు. వర్షంపై రెడ్ అలర్ట్ జారీ చేసిన నేపథ్యంలో ఈ చర్యలు తప్పవన్నారు. సంబంధిత జిల్లా అధికారులు సరైన చర్యలు తీసుకోవాలని తన లేఖలో మెజిస్ట్రేట్లను కోరారు.
వాతావరణం కుదుట పడిన తర్వాత మళ్లీ యాత్రను ప్రారంభించనున్నట్లు చెప్పారు. శనివారం కోసం భగేశ్వర్, పిత్తోరఘర్, చంపావత్, నైనిటాల్, ఉద్దంసింగ్ నగర్కు రెడ్ అలర్ట్ జారీ చేశారు. ఇక డెహ్రాడూన్, పౌరి, రుద్రప్రయాగ్, చమోలీ, ఆల్మోరా జిల్లాలకు ఆరెంజ్ అలర్ట్ ఇచ్చారు. ఇక హరిద్వార్, ఉత్తరకాశీ, తెహ్రీ జిల్లాలకు పసుపు రంగు హెచ్చరిక జారీ చేశారు. ఇక ఆదివారం కోసం డెహ్రాడూన్, తెహ్రీ, పౌరి, హరిద్వార్కు రెడ్ అలర్ట్ జారీ చేశారు.
