Parvinder Jhota: డ్ర‌గ్స్ అమ్మ‌డాన్ని ప్ర‌శ్నించిన ప‌ర్వీంద‌ర్‌.. ఫేస్‌బుక్‌ లైవ్ స్ట్రీమింగ్‌లోనే కాల్చివేత‌

Parvinder Jhota : డ్ర‌గ్స్‌కు వ్య‌తిరేకంగా పోరాటం చేస్తున్న ప‌ర్వీంద‌ర్ సింగ్ అలియాస్ జోటాను కాల్చి చంపారు. మెడిక‌ల్ షాపుల్లో డ్ర‌గ్స్ ను అక్ర‌మంగా అమ్ముతున్న‌ట్లు ఎఫ్‌బీ లైవ్‌లో ఓ వీడియో చేస్తున్న స‌మ‌యంలోనే ఈ ఘ‌ట‌న జ‌రిగింది.

చండీఘ‌డ్‌: డ్ర‌గ్స్‌కు వ్య‌తిరేకంగా పోరాటం చేస్తున్న ప‌ర్వీంద‌ర్ సింగ్(Parvinder Jhota) అలియాస్ జోటాను కాల్చి చంపారు. మెడిక‌ల్ షాపుల్లో డ్ర‌గ్స్ ను అక్ర‌మంగా అమ్ముతున్న‌ట్లు ఓ వీడియో తీస్తున్న స‌మ‌యంలోనే ఈ ఘ‌ట‌న జ‌రిగింది. మాన‌స ప‌ట్ట‌ణంలోని ఓ కెమిస్ట్ షాపు వ‌ద్ద ఆ షాపు ఓన‌ర్ అత‌న్ని కాల్చేశాడు. అయితే ఈ ఘ‌ట‌న మొత్తం ఫేస్‌బుక్‌లో లైవ్ స్ట్రీమింగ్ అయ్యింది. ప‌ర్వీంద‌ర్‌తో ఉన్న మ‌రో న‌లుగురికి బుల్లెట్ గాయాలు అయ్యాయ‌ని పోలీసులు చెప్పారు. కొన్ని ర‌కాల డ్ర‌గ్స్‌ను అమ్మ‌డాన్ని వ్య‌తిరేకిస్తూ కెమిస్ట్ షాపు ఓన‌ర్‌తో జోటా ఘ‌ర్ష‌ణ ప‌డ్డారు. ఆ స‌మ‌యంలో జ‌రుగుతున్న వాగ్వాదాన్ని అత‌ను రికార్డు చేశాడు. అయితే ఆ స‌మ‌యంలోనే ఆ షాపు ఓన‌ర్ అత‌న్ని షూట్ చేశాడు.

జోటా ఫేస్‌బుక్ పేజీలో 5.48 నిమిషాల లైవ్ వీడియోను స్ట్రీమింగ్ చేశారు. కెమిస్ట్ షాపు ఓన‌ర్ పిస్తోల్‌ను బ‌య‌టకు తీశాడ‌ని లైవ్‌లో చెబుతున్న స‌మ‌యంలోనే అత‌న్ని షూట్ చేశాడు.మాన‌స ప‌ట్ట‌ణంలోని సివిల్ ఆస్ప‌త్రికి త‌ర‌లించారు. కానీ జోటా మాత్రం మృతిచెందిన‌ట్లు డాక్ట‌ర్లు చెప్పారు. ప‌ర్వీంద‌ర్‌కు మూడు బుల్లెట్ గాయాలు అయిన‌ట్లు ఆస్ప‌త్రి డాక్ట‌ర్ గుర్మెయిల్ సింగ్ తెలిపారు. రెండు క‌డుపులో, ఒక‌టి తొడ‌లో దిగిన‌ట్లు చెప్పారు. లివ‌ర్‌లో బుల్లెట్ దిగ‌డం వ‌ల్ల అత‌ను మ‌రణించిన‌ట్లు తెలిపారు.