Flying Car India | ఇంజినీరు కాకున్నా ఎగిరే కారు తయారు చేశాడు.. ఉత్తరాఖండ్‌వాసి అద్భుతం!

Flying Car India | ఉత్తరాఖండ్‌లోని అల్మోరా జిల్లాకు చెందిన రవి తామ్తా ఎలాంటి ఇంజినీరింగ్‌ విద్య లేకుండానే సొంతంగా ఎలక్ట్రిక్‌ ఫ్లయింగ్‌ కారు(ఎగిరే కారు) ప్రొటోటైప్‌ను విజయవంతంగా తయారు చేశాడు.

Flying Car India | అల్మోరా : ఉత్తరాఖండ్‌లోని అల్మోరా జిల్లాకు చెందిన రవి తామ్తా ఎలాంటి ఇంజినీరింగ్‌ విద్య లేకుండానే సొంతంగా ఎలక్ట్రిక్‌ ఫ్లయింగ్‌ కారు(ఎగిరే కారు) ప్రొటోటైప్‌ను విజయవంతంగా తయారు చేశాడు. ‘హాపిడా స్కై ప్రైవేట్‌ లిమిటెడ్‌’ ద్వారా 2015 నుంచి ఈ ఆలోచనపై పనిచేస్తూ, ఇంటర్నెట్‌ సమాచారాన్ని నమ్ముకుని, తన తండ్రి సహకారంతో ఈ ప్రయోగాన్ని సాకారం చేశాడు. ‘హాపిడా స్కైనెక్స్‌’ అని పేరు పెట్టిన ఈ వాహనం రన్‌ వే అవసరం లేకుండా నిలువుగా టేకాఫ్‌, ల్యాండిగ్‌ చేయగలదు.

పల్లె నుంచి మొదలైన ఆలోచన

ఉత్తరాఖండ్‌లోని అల్మోరా జిల్లా కాఫ్లీఖాన్‌ గ్రామానికి చెందిన రవి తామ్తా నైనిటాల్‌ క్యాంపస్‌లో బ్యాచిలర్‌ ఆఫ్‌ ఆర్ట్స్‌ (బీఏ) డిగ్రీ పూర్తి చేశాడు. ఆయన తండ్రి హరీశ్‌ రామ్‌ మెకానిక్‌గా పనిచేస్తున్నారు. కొండ ప్రాంతాల్లో ఒకచోటు నుంచి మరోచోటుకు వెళ్లేందుకు ఎదురయ్యే ఇబ్బందులు, ముఖ్యంగా అత్యవసర పరిస్థితుల్లో ఆసుపత్రులకు చేరుకోవడంలో పడే కష్టాలు రవిని ఆలోచింపజేశాయి. ఈ సమస్యలకు పరిష్కారంగా ఎగిరే వాహనాన్ని తయారు చేయాలని 2015లో లక్ష్యంగా పెట్టుకున్నాడు.

ఇంజినీరింగ్‌ విద్య లేకపోయినా సాంకేతిక పరిజ్ఞానాన్ని స్వయంగా నేర్చుకునేందుకు రవి ప్రయత్నించాడు. ఇంటర్నెట్‌లో అందుబాటులో ఉన్న సమాచారాన్ని అధ్యయనం చేస్తూ, వివిధ ప్రయోగాలు చేస్తూ తన ఆలోచనకు రూపమిచ్చాడు. తన సంస్థ హాపిడా స్కై ప్రైవేట్‌ లిమిటెడ్‌ ద్వారా ఈ ప్రాజెక్టుపై పనిచేశాడు. ఈ క్రమంలో రూపొందించిన నమూనాకు ‘హాపిడా స్కైనెక్స్‌’ అని పేరు పెట్టాడు.

హాపిడా స్కైనెక్స్‌ ఒకే వ్యక్తి ప్రయాణించేందుకు రూపొందించిన ఎలక్ట్రిక్‌ ఫ్లయింగ్‌ కారు నమూనా. ఇందులో పలు ఎలక్ట్రిక్‌ మోటార్లు, ప్రొపెల్లర్లు ఉంటాయి. డ్రోన్లలో ఉపయోగించే సాంకేతికతకు దగ్గరగా ఉండే ఈ వ్యవస్థ ద్వారా వాహనం నిలువుగా పైకి లేచి, అదే విధంగా కిందకు దిగేలా రూపొందించారు. తేలికపాటి ఫ్రేమ్‌, కాక్‌పిట్‌, పారదర్శకమైన కవర్‌ దీని ప్రత్యేకతలు. బ్యాటరీల ద్వారా పనిచేసే ఈ వాహనానికి సంప్రదాయ విమాన ఇంధనం అవసరం లేదు.

గత ఆగస్టులో నిర్వహించిన పరీక్షా ప్రయాణం ఈ ప్రాజెక్టులో కీలక ముందడుగుగా నిలిచింది. అయితే ఇది ప్రాథమిక నమూనా మాత్రమే. ప్రయాణికులను తీసుకెళ్లే స్థాయిలో భద్రత, పనితీరు నిరూపించుకోవడంతోపాటు అవసరమైన సాంకేతిక పరీక్షలు, విమానయాన నియంత్రణ సంస్థల అనుమతులు పొందాల్సి ఉంది.

రవి తామ్తా గతంలోనూ ప్రజలకు ఉపయోగపడే పలు పరికరాలను రూపొందించినట్టు సమాచారం. మొబైల్‌ ఫోన్‌కు ఛార్జింగ్‌ అందించే బూట్లు, దృష్టిలోపం ఉన్నవారికి ఉపయోగపడే స్మార్ట్‌ వాకింగ్‌ స్టిక్‌, వెదురును చీల్చే యంత్రం, అగ్నిమాపక పరికరాలు ఆయన ఆవిష్కరణల్లో ఉన్నాయి. అటవీ శాఖ కోసం కూడా అగ్నిమాపక పరికరాన్ని రూపొందించినట్టు తెలుస్తోంది.

కొండ ప్రాంతాల్లో తక్కువ దూరాలకు వేగంగా ప్రయాణించేందుకు, అత్యవసర వైద్య సేవలకు భవిష్యత్తులో ఇలాంటి వాహనాలు ఉపయోగపడే అవకాశాలున్నాయి. అయితే అందుకు మరిన్ని పరీక్షలు, భద్రతా ప్రమాణాల నిర్ధారణ అవసరం. ఆసక్తి, పట్టుదలతో కొత్త విషయాలను నేర్చుకుంటే వినూత్న ఆలోచనలకు బాటలు వేయవచ్చని రవి ప్రయాణం చాటుతున్నది.