Visit:
భోపాల్‌: ఒక విద్యార్థి స్కూల్‌కు మొబైల్‌ ఫోన్‌ తీసుకువచ్చాడు. స్కూల్‌ నిబంధనలు ఉల్లంఘించినందుకు ప్రిన్సిపాల్‌ మందలించాడు. దీంతో ఆ విద్యార్థి 52 సార్లు సారీ చెప్పాడు. ఆ తర్వాత పరుగెత్తి స్కూల్‌ బిల్డింగ్‌ పైనుంచి కిందకు దూకాడు. (Student Jumps From School Building) జాతీయ స్థాయి స్కేటింగ్ కీడ్రాకారుడైన ఆ బాలుడు తీవ్రంగా గాయపడ్డాడు. మధ్యప్రదేశ్‌లోని రత్లాంలో ఈ సంఘటన జరిగింది. డోంగ్రే నగర్‌లోని ప్రైవేట్‌ స్కూల్‌లో 13 ఏళ్ల బాలుడు 8వ తరగతి చదువుతున్నాడు. జాతీయ స్థాయి స్కేటింగ్ పోటీల్లో పాల్గొన్న అతడు పలు మెడల్స్‌ సాధించాడు.
కాగా, నవంబర్‌ 27న ఆ విద్యార్థి స్కూల్‌కు మొబైల్‌ ఫోన్‌ తీసుకువచ్చాడు. క్లాస్‌రూమ్‌లో వీడియో రికార్డ్‌ చేశాడు. దీనిని సోషల్‌మీడియాలో పోస్ట్‌ చేశాడు. ఆ స్కూల్‌ యాజమాన్యానికి ఈ విషయం తెలిసింది. స్కూల్‌ నిబంధనలకు విరుద్ధంగా మొబైల్‌ ఫోన్‌ తీసుకురావడంపై ఆ బాలుడి పేరెంట్స్‌ను పిలిపించారు.
మరోవైపు నవంబర్‌ 28న ఆ విద్యార్థి తండ్రి ఆ స్కూల్‌కు చేరుకున్నాడు. రెండో అంతస్తులోని వెయిటింగ్‌ రూమ్‌లో వేచి ఉన్నాడు. అయితే మూడో అంతస్తులో ఉన్న ప్రిన్సిపాల్‌ రూమ్‌లోకి ఆ విద్యార్థి వెళ్లాడు. నాలుగు నిమిషాల పాటు అక్కడ ఉన్నాడు. భయంతో 52 సార్లు సారీ చెప్పాడు.
అయితే ఆ బాలుడ్ని స్కూల్‌ నుంచి సస్పెండ్‌ చేస్తామని, స్కేటింగ్‌లో అతడు సాధించిన పతకాలు స్వాధీనం చేసుకుంటామని ప్రిన్సిపాల్‌ బెదిరించినట్లు సమాచారం. దీంతో తన చదువు, జీవితం నాశమవుతుందని ఆ విద్యార్థి ఆందోళన చెందాడు. ప్రిన్సిపాల్‌ రూమ్‌ నుంచి బయటకు పరుగుతీశాడు. స్కూల్‌ బిల్డింగ్‌ మూడో అంతస్తు నుంచి కిందకు దూకాడు.
తీవ్రంగా గాయపడిన ఆ బాలుడ్ని తొలుత స్థానిక ఆసుపత్రికి ఆ తర్వాత మెరుగైన చికిత్స కోసం ప్రైవేట్‌ ఆసుపత్రికి తరలించారు. ఆ విద్యార్థి ఆరోగ్య పరిస్థితి ప్రస్తుతం నిలకడగా ఉన్నట్లు తెలుస్తున్నది. పోలీసులు ఈ సంఘటనపై దర్యాప్తు చేస్తున్నారు. పూర్తి దర్యాప్తు తర్వాత బాధ్యులపై తగిన చర్యలు తీసుకుంటామని విద్యాశాఖ అధికారి తెలిపారు.
Also Read:
SIR Deadline Extended | ‘సర్‌’ గడువు వారం రోజులు పొడిగింపు.. ఫిబ్రవరి 14న తుది జాబితా
14 Bills To Be Introduced | పార్లమెంట్‌లో 14 బిల్లులు ప్రవేశపెట్టనున్న కేంద్రం.. అవి ఏవంటే?
all-party meet | అఖిలపక్ష సమావేశం నిర్వహించిన కేంద్రం.. పలు అంశాలపై గళమెత్తనున్న ప్రతిపక్షం
