న్యూఢిల్లీ : కొవిడ్ కొత్త వేరియంట్ ఒమిక్రాన్పై ఇప్పటికే ఉన్న వ్యాక్సిన్లు పని చేయవనడానికి ఎలాంటి ఆధారాలు లేవని కేంద్ర ఆరోగ్యమంత్రిత్వ శాఖ శుక్రవారం తెలిపింది. అయితే, కొత్తగా గుర్తించిన వేరియంట్లు వ్యాక్సిన్ ప్రభావాన్ని తగ్గించవచ్చని పేర్కొంది. కొత్త ఉత్పరివర్తనం రోగనిరోధక శక్తిని ఎంత వరకు ప్రభావితం చేస్తుందనే దానిపై ఆధారాలు కావాలని, దీనికి మరింత సమయం పడుతుందని పేర్కొన్నది. ప్రపంచ ఆరోగ్య సంస్థ కొత్త వేరియంట్ను ‘వేరియంట్ ఆఫ్ కన్సర్న్’గా గుర్తించింది. అయితే, ఒమిక్రాన్ వేరియంట్కు సంబంధించి తరచూ అడిగి ప్రశ్నల (FAQs) జాబితాను మంత్రిత్వ శాఖ విడుదల చేసింది.
వ్యాక్సినేషన్ ముఖ్యం
శరీరంలోకి ప్రవేశించిన కొవిడ్ వైరస్ నుంచి కాపాడేందుకు యాంటీబాడీలు రక్షణ కల్పిస్తాయి. ఈ క్రమంలో అర్హులైన ప్రతి ఒక్కరూ తప్పనిసరిగా టీకాలు తీసుకోవడం ముఖ్యమని వైద్యులు సూచిస్తున్నారు. దక్షిణాఫ్రికాలో వెలుగు చూసిన వైరస్.. వేగంగా పలు దేశాలకు వ్యాపించింది. వైరస్ లక్షణాలను బట్టి చూస్తే మరిన్ని దేశాలకు వ్యాపించే అవకాశం ఉందని మంత్రిత్వ శాఖ పేర్కొంది. కేసుల పెరుగుదల, వైరస్ తీవ్రతపై ఇప్పటికీ అస్పష్టంగానే ఉన్నది. కొవిడ్ టీకాలు వేగంగా వేయడం ద్వారా డెల్టా తీవ్రత తక్కువ ఉందని ఆరోగ్యమంత్రిత్వ శాఖ పేర్కొంది. అయితే ప్రస్తుతం అందుబాటులో ఉన్న టెస్టులతో ఒమిక్రాన్ వేరియంట్ సోకిందా? లేదా? తెలుసుకోవచ్చా అనే ప్రశ్నకు.. సాధారణంగా వినియోగిస్తున్న ఆర్టీ పీసీఆర్ పద్ధతిని వినియోగించి తెలుసుకోవచ్చని పేర్కొంది.