చిరంజీవి మాటలు స్ఫూర్తినిచ్చాయి

‘కష్టపడితేనే విజయం వరిస్తుందని చిరంజీవిగారు చెప్పిన మాటలను స్ఫూర్తిగా తీసుకొని ఈ సినిమా చేశా. హీరోగా నాకు చక్కటి శుభారాంభాన్ని అందిస్తుందనే నమ్మకముంది’ అని అన్నారు పవన్‌తేజ్‌ కొణిదెల. ఆయన హీరోగా నటిస్తున్న చిత్రం ‘ఈ కథలో పాత్రలు కల్పితం’. రాజేష్‌నాయుడు నిర్మాత. అభిరామ్‌.ఎమ్‌ దర్శకుడు. మేఘన కథానాయిక. ఈ నెల 26న ఈ చిత్రం విడుదలకానుంది. మంగళవారం హైదరాబాద్‌లో ఈ చిత్ర ప్రీ రిలీజ్‌ వేడుక జరిగింది. ఈ కార్యక్రమానికి ముఖ్య అతిథిగా హాజరైన గేయరచయిత చంద్రబోస్‌ మాట్లాడుతూ ‘టైటిల్‌ బాగుంది. ఈ సినిమాకు సంగీతాన్ని అందించిన కార్తిక్‌తో పాటు నటీనటులు, సాంకేతిక నిపుణులు అందరికీ మంచి పేరు తీసుకురావాలి’ అని పేర్కొన్నారు. దర్శకుడు మాట్లాడుతూ ‘మెగా ఫ్యామిలీ హీరోతో సినిమా చేయడం ఆనందంగా ఉంది. కథ వినకుండానే నిర్మాత ఈ చిత్రాన్ని తెరకెక్కించడానికి అంగీకరించారు. క్రైమ్‌ సస్పెన్స్‌, లవ్‌, థ్రిల్లర్‌ అంశాలతో ఆసక్తికరంగా ఉంటుంది’ అని తెలిపారు. ఇలాంటి చిన్న సినిమాల్ని ఆదరించినప్పుడే ఇండస్ట్రీ బాగుంటుందని గాయకుడు రాహుల్‌ సిప్లిగంజ్‌ అన్నారు. ఈ కార్యక్రమంలో రాజేష్‌నాయుడు, నోయల్‌ తదితరులు పాల్గొన్నారు.