అనాజీపూర్‌లో పంటలకు చెరువు నీరు విడుదల.. హర్షం వ్యక్తం చేసిన రైతులు

పంటలకు నీరందించేందుకు గ్రామ సర్పంచ్‌ నిర్మల ఆధ్వర్యంలో శుక్రవారం చెరువు తూమును తెరిచి నీటిని విడుదల చేశారు.

రాయపోల్‌. అక్టోబర్ 09 : సిద్ధిపేట జిల్లా రాయపోల్‌ మండలం అనాజీపూర్‌ గ్రామ పరిధిలోని పెద్ద చెరువు ఆయకట్టు కింద సాగు చేస్తున్న వరి పంటలకు నీరందించేందుకు గ్రామ సర్పంచ్‌ నిర్మల ఆధ్వర్యంలో శుక్రవారం చెరువు తూమును తెరిచి నీటిని విడుదల చేశారు. చెరువు కింద సాగు చేస్తున్న వరి పంటలు నీటి కొరతతో ఎండిపోయే పరిస్థితి ఏర్పడటంతో స్పందించిన సర్పంచ్‌, వార్డు సభ్యులు, గ్రామస్తులు, ఆయకట్టుదారులు కలిసి ఈ నిర్ణయం తీసుకున్నారు. వరి పంటకు కీలకమైన సమయంలో నీరు అందకపోతే దిగుబడిపై ప్రభావం పడే ప్రమాదం ఉండటంతో రైతులు ఆందోళన చెందారు.

ఈ నేపథ్యంలో సర్పంచ్‌ చొరవ తీసుకుని గ్రామస్తులు, వార్డు సభ్యులు, ఆయకట్టుదారులతో కలిసి పంట పొలాలకు నీరు విడుదల చేశారు. చెరువు నుంచి నీరు పొలాలకు చేరుతుండటంతో రైతులు హర్షం వ్యక్తం చేశారు. సాగు సమయంలో పంటలకు నీరందించడం ఎంతో ఉపయుక్తంగా ఉంటుందని పేర్కొన్నారు. రైతుల సమస్యలను గుర్తించి సకాలంలో స్పందించిన సర్పంచ్‌, వార్డు సభ్యులు, గ్రామస్తులకు ఆయకట్టుదారులు కృతజ్ఞతలు తెలిపారు.