Grain procurement | లారీల కొరతతో నిలిచిన ధాన్యం కొనుగోళ్లు

రామాయంపేట పీఏసీఎస్‌ అధ్వర్యంలో ఏర్పాటు చేసిన ధాన్యం కొనుగోలు కేంద్రానికి లారీల కొరత సమస్య తలెత్తింది.

నిజాంపేట,నవంబర్‌15 : మెద‌క్ జిల్లా నస్కల్‌లో రామాయంపేట పీఏసీఎస్‌ అధ్వర్యంలో ఏర్పాటు చేసిన ధాన్యం కొనుగోలు కేంద్రానికి లారీల కొరత సమస్య తలెత్తింది. ఈ సందర్భంగా స్థానిక రైతులు మాట్లాడుతూ వారం రోజులుగా లారీలు రాకపోవడంతో ఎక్కడి ధాన్యం అక్కడే ఉందని వ్యవసాయం చేయలంటేనే భయంగా ఉందన్నారు. మారుతున్న వాతవరణ పరిస్థితుల వల్ల వర్షం పడుతుందనే భయంతో కొంత మంది రైతులు ఆందోళ‌న వ్య‌క్తం చేస్తున్నారు.

కొనుగోలు కేంద్రానికి తరలించిన ధాన్యం ఎప్పుడో కొంటారో అనే భయంతో మరికొంత మంది రైతులు తమ ధాన్యాన్ని దళారులకు విక్రయిస్తున్నారని ఆవేదన వ్యక్తం చేశారు. ఈ సమస్యపై అధికారులు స్పందించి కొనుగోలు కేంద్రానికి లారీలు వచ్చేలా…త్వరితగతిన కొనుగోలు జరిగేలా చర్యలు తీసుకోవాలని రైతులు కోరుతున్నారు. కార్యక్రమంలో రైతులు కుర్మ దుబ్బయ్య, రమేశ్‌, గుమ్ముల పర్శరాములు, మెట్టు నాంపల్లి, పాగల దుర్గయ్య తదితరులు ఉన్నారు.