Maganur | షార్ట్‌ సర్య్కూట్‌తో ఇళ్లు దగ్ధం..పరామర్శించిన మాజీ ఎమ్మెల్యే

Maganur | నారాయణపేట జిల్లా మాగనూర్‌ మండలం నెరడగం గ్రామంలో షార్ట్‌సర్క్యూట్‌ తో వెంకటరాములు ఇల్లు పూర్తిగా దగ్ధమైంది .

మాగనూర్ : నారాయణపేట జిల్లా మాగనూర్‌ ( Maganur ) మండలం నెరడగం గ్రామంలో షార్ట్‌సర్క్యూట్‌ ( Short-circuit ) తో వెంకటరాములు ఇల్లు పూర్తిగా దగ్ధమైంది ( House gutted ). ఈ అగ్నిప్రమాదంలో ఇంట్లోని బంగారం, వెండి ఆభరణాలు, నగదు, బియ్యం, ఇంటి , వాహనాల కాగితాలు, నిత్యావసర సరుకులు అగ్నికి ఆహుతయ్యాయి. దీంతో బాధిత కుటుంబం సర్వం కోల్పోయి తీవ్ర ఆర్థిక ఇబ్బందుల్లో పడింది.

విషయం తెలుసుకున్న మఖ్తల్ మాజీ ఎమ్మెల్యే చిట్టెం రామ్మోహన్ రెడ్డి బాధిత కుటుంబాన్ని పరామర్శించారు. అగ్నిప్రమాదం జరిగిన ఇంటిని పరిశీలించి, కాలిపోయిన ఇంటి సామగ్రిని, జరిగిన నష్టాన్ని అడిగి తెలుసుకున్నారు. పోలీసులు వచ్చి విచారణ చేపట్టి ఎలాంటి చర్యలు చేపట్టక పోవడంతో మాజీ ఎమ్మెల్యే సంబంధిత అధికారులతో మాట్లాడి అగ్నిప్రమాద వివరాలను తెలియజేశారు.

బాధిత కుటుంబానికి జరిగిన నష్టాన్ని వివరించి, వారికి సహాయం అందించేలా చర్యలు తీసుకోవాలని కోరారు. ప్రభుత్వం వెంటనే స్పందించి బాధిత కుటుంబానికి తగిన ఆర్థిక పరిహారం అందించాలని, ఇంటి పునర్నిర్మాణానికి, నిత్యావసర వస్తువుల కొనుగోలుకు అవసరమైన సహాయాన్ని అందించి ఆదుకోవాలని బాధిత కుటుంబ సభ్యులు కోరారు.