దృశ్యం పునరావృతం!

తెలంగాణ ఎద మీద కలుపుమొక్కల్లా పరాయి విగ్రహాలు మొలుస్తున్నాయి తుది దశ ఉద్యమమేదో మిగిలే ఉందని గుర్తు చేస్తున్నాయి!

తెలంగాణ ఎద మీద కలుపుమొక్కల్లా
పరాయి విగ్రహాలు మొలుస్తున్నాయి
తుది దశ ఉద్యమమేదో
మిగిలే ఉందని గుర్తు చేస్తున్నాయి!

ఒక విమోచనం ఒక సుదీర్ఘ విముక్తి
నిద్ర లేపిన ఆత్మగౌరవ ప్రతీక
ఎవరి ఊహకందని
సకల జనుల పోరాటం
వెక్కిరింపులకు లోనవుతున్నవి!

చెప్పినా విననందుకు
ఊహించని దృశ్యమొకటి
నిత్యం పునరావృతమవుతున్నది
తెరవెనుక బాగోతమొకటి
సరిహద్దు శత్రుదళాల్లా కవ్విస్తున్నాయి!

భౌగోళిక విడిపోతకు
విద్వేషపు పూత పూస్తున్నారు
తరం మారుతున్నది
మహాత్ముడు దిగివచ్చి చెప్పినా
ఇప్పటి కవ్వింపులకు
శాంతిమంత్రం పనిచేయకపోవచ్చు!

ముగింపు తెలియని
యుద్ధం మొదలు పెట్టొద్దు
విధ్వంసానికి పునాదులు తీయొద్దు!

ఒక అర్భకుడికి ఎక్కడా
తెలంగాణ పదమే కనపడలేదట
అతనిప్పుడు ఏ ప్రాంతానికి అధ్యక్షుడు?!
మోచేతి నీళ్లకు మరిగినవాళ్లను
చరిత్ర ఎన్నడూ క్షమించదు!

యోధుల్లారా!
కొత్త తరాన్ని నిద్రలేపండి
అధికారమే పరమావధి కాదు
ఆత్మగౌరవానికి భంగం రానీయకండి!

ద్రోహులు మనవాళ్లే అయితే
పాతర పెట్టేందుకు
కాళోజీ సాక్షిగా
సమాధులు తవ్వండి
తుది దశ ఉద్యమానికి
మరోసారి వాకిళ్లు తెరవండి!!

-కోట్ల వెంకటేశ్వరరెడ్డి
9440233261