పల్లవి: చెట్టంత ఎదిగిన ఓ మనిషి
చెట్టంటే నీకెందుకు జలసి
చెట్టులేని బతుకు లేదని తెలిసి
బతకబోకు బాధ్యత నువు మరిచి
అను పల్లవి: చెట్టే జీవితము లేకుంటె శూన్యము
పెట్టు నువ్వొక చెట్టు తోడుంటది ఒట్టు ॥చెట్టంత॥
చరణం: నవ మాసాలు మోసి కన్నది నీ తల్లి
ప్రాణవాయువిచ్చి పెంచెను చెట్టు తల్లి
జన్మనిచ్చిన అమ్మ దైవమై కొలువుంది
జగతిని ఆడించె చెట్టు దయ్యమెందుకౌతోంది
చెట్టూ అమ్మే కదా..
(నువ్వు) ఆ అమ్మ బిడ్డవె కదా…
పెట్టు నువ్వొక చెట్టు ఫలముంటది ఒట్టు ॥చెట్టంత॥
చరణం: తినె తిండొక చెట్టు కట్టు బట్టొక చెట్టు
కడదాకా చెట్టు తోడుంటది ఒట్టు
పొట్ట బట్ట చట్టైతే పట్టదెందుకు చెట్టంటే
ప్రగతికదే మట్టైతే గిట్టదెందుకు చెట్టంటే
చెట్టుకు బతుకునిస్తె..
మనకది బతుకిస్తది…
పెట్టు నువ్వొక చెట్టు ఆసరౌతది ఒట్టు ॥చెట్టంత॥
చరణం: నీ కట్టెలో ప్రాణం ఉన్నంత కాలం
కట్టె నీకవసరమె అది తెలిసిన నిజమే
కట్టెల్లో బతికె కట్టె కట్టెల్లో కాలే కట్టె
కట్టెలిచ్చె చెట్టంటే పట్టదెందుకు నీ కట్టెకు
ప్రాణమున్న కట్టెవైతె..
కట్టె నీ ప్రాణమైతె…
పెట్టు నువ్వొక చెట్టు సంరక్షణ చేపట్టు ॥చెట్టంత॥
-ఆరుట్ల నరేశ్, 94409 91345