కన్ను తెరిచి చూడాలనుకున్నా
రెప్ప లేవటం లేదు
దృశ్యాలు కనుమరుగవుతున్నాయి
పథకం మాట్లాడుతే బాగుండేది
సరియైనదో కాదో తెలిసేది
ఒంటరితనాలు అంటరానితనాలు
నియంతృత్వం శాసించే ఏకత్వాలు !
ఆలోచించే మెదళ్లను బంధించి
ప్రశ్నించేవారి గొంతులు నులిమేసి
నిరాయుధీకరణ
నిస్సాయతీకరణ
మనిషిని కుంగదీస్తుంది
మనిషిని మనిషిగా చూడని
మానవత్వపు విలువలకు తావులేదు
ఇన్నాళ్లూ లేని ఇవ్వాళ్ల ఆ మోములో
కాంతిని చూస్తున్నాను !
అదొక ఆణిముత్యమని
తోడుగా వజ్రాన్ని చెక్కాను !
అదొక గొప్ప నేర్పరని
ఓర్పుతో విలువిద్య అప్పజెప్పాను !
ఏది గురిచూసి పెడుతుందో
అదో గొప్ప విద్య !
ధ్యానం అధ్వాన్నం కాకూడదు !
నిష్ట అప్రతిష్ట పాలు పడకూడదు !
కంటి చూపు బాణమవ్వాలి!
సారించిన అస్ర్తాలన్నీ
సంధించటానికి సిద్ధమవ్వాలి !
చిట్ట చివరగా చెబుతున్నా-
దానిలో మోడును చూడలేను
అది వసంత మవ్వాలి !
శాఖోపశాఖలుగా విస్తరించి
వృక్షాలుగా విరబూసే
ఆకాశానికంటుతున్న అరణ్యమవ్వాలి!!
-కందుకూరి శ్రీరాములు
9440119245