గర్భధారణ సమయంలో తగినన్ని పోషకాలు తీసుకోకపోతే, కాబోయే తల్లి ఆరోగ్యం మీద తీవ్ర ప్రభావం పడుతుంది. అంతేనా! పుట్టబోయే బిడ్డ రోగ నిరోధక శక్తి దెబ్బతినే ఆస్కారమూ ఉంది. ఈ విషయం అందరికీ తెలిసిందే. అయినా మనం నిర్లక్ష్యం చేస్తూనే ఉంటామని పరిశోధకులు ఆందోళన వ్యక్తం చేస్తున్నారు. ఈ విషయాన్ని నిరూపించేందుకు బ్రిటన్, న్యూజిలాండ్, సింగపూర్లోని 1,700 మంది గర్భిణుల ఆరోగ్యాన్ని విశ్లేషించారు. పేద దేశాల గర్భిణుల్లోనే పోషకాల సమస్య అధికమనే అపోహ ఉంది.
నిజానికి, ధనిక దేశాల్లో కూడా పోషక విలువల లోపం కనిపిస్తుంది. విటమిన్-బి12, బి6, డితో పాటు రైబోఫ్లావిన్, ఫోలిక్ యాసిడ్ లాంటి పోషకాలూ లోపిస్తున్నట్టు తేలింది. ఏకంగా 90 శాతం మందిలో ఏదో ఒక పోషక లోపం బయటపడింది. ఇందుకు కారణమూ స్పష్టమే. సంపన్న దేశాల గర్భిణులు జంక్ఫుడ్ వలలో పడిపోయి.. మాంసాహారం, పాల పదార్థాల నుంచి వచ్చే ప్రత్యేక పోషకాలను తీసుకోవడం లేదు. ఫలితంగా అన్నీ ఉన్నా ఒకరు, ఏమీ లేక మరొకరు.. పోషకాల సమస్యలపాలు అవుతున్నారు.