నమస్తే డాక్టర్. నా వయసు 41 సంవత్సరాలు. ఇద్దరు పిల్లలు. ఇటీవల నెలసరి ముందు రోజుల్లో రొమ్ములు విపరీతంగా నొప్పి చేస్తున్నాయి. నడిచినా, ఏదైనా తగిలినా తట్టుకోలేకపోతున్నా. రాత్రిపూట కూడా బ్రా వేసుకుని పడుకోవాల్సి వస్తున్నది. నా సమస్య ఏమిటి? ఎందుకిలా జరుగుతున్నది?
-ఓ పాఠకురాలు
నెలసరికి ముందు వక్షోజాల్లో నొప్పి, రొమ్ములు బరువు చేయడంలాంటి సమస్య చాలా మందిలో కనిపిస్తుంది. దీన్ని ‘ప్రీ మెన్స్ట్రువల్ మాస్టా ల్జియా’గా పిలుస్తారు. ఒక వయసు వచ్చాక అండం విడుదల సమయంలో వెలువడే ప్రొజెస్టిరాన్ హార్మోన్ ఈ నొప్పికి కారణం. ముప్పైలు దాటిన స్త్రీలలో ఈ సమస్య ఎక్కువగా కనిపిస్తుంది. శరీర తత్వాన్ని బట్టి కొందరిలో నెలసరికి ముందు, మరికొందరిలో తర్వాత, ఇంకొందరిలో రెండు నెలసరుల మధ్య ఈ నొప్పి ఉంటుంది. అయితే ఇది క్యాన్సర్ వ్యాధికి గుర్తేం కాదు. పెద్దగా భయపడనక్కర్లేదు. నొప్పి మరీ ఎక్కువైతే గైనకాలజిస్టును సంప్రదించండి. నలభైలలో ఉన్నారు కాబట్టి, సోనోమామోగ్రామ్ పరీక్ష చేయించుకుంటే ఇంకా మంచిది.