తక్కెళ్లపాడు సర్పంచ్‌కు మంత్రి సీత‌క్క‌ ప్రశంస

ఖమ్మం జిల్లా ఎర్రుపాలెం మండలంలోని తక్కెళ్లపాడు గ్రామ పంచాయతీ అభివృద్ధి పనుల నిర్వహణకు రాష్ట్రస్థాయిలో గుర్తింపు లభించింది. తెలంగాణ ప్రభుత్వం నిర్వహించిన రాష్ట్రస్థాయి వీడియో కాన్ఫరెన్స్‌లో గ్రామ సర్పంచ్ ముక్కర రామకృష్ణారెడ్డిని పంచాయతీరాజ్ శాఖ మంత్రి...

ఎర్రుపాలెం, అక్టోబర్ 28 : ఖమ్మం జిల్లా ఎర్రుపాలెం మండలంలోని తక్కెళ్లపాడు గ్రామ పంచాయతీ అభివృద్ధి పనుల నిర్వహణకు రాష్ట్రస్థాయిలో గుర్తింపు లభించింది. తెలంగాణ ప్రభుత్వం నిర్వహించిన రాష్ట్రస్థాయి వీడియో కాన్ఫరెన్స్‌లో గ్రామ సర్పంచ్ ముక్కర రామకృష్ణారెడ్డిని పంచాయతీరాజ్ శాఖ మంత్రి సీతక్క, ఆ శాఖ కమిషనర్ ప్రత్యేకంగా అభినందించారు. ప్రభుత్వం మంజూరు చేసిన వీఓ భవనం, షెడ్డు, గోడౌన్ నిర్మాణ పనులను సకాలంలో పూర్తి చేసి, పనుల నిర్వహణలో సమర్థత కనబరిచినందుకు ఈ ప్రశంసలు దక్కాయి. రాష్ట్రంలోని ఇతర గ్రామ పంచాయతీలు కూడా ప్రభుత్వం మంజూరు చేసిన అభివృద్ధి పనులను వేగంగా పూర్తి చేసి, బిల్లుల చెల్లింపుల ప్రక్రియను సద్వినియోగం చేసుకోవాలని సూచించారు. తక్కెళ్లపాడు గ్రామ పంచాయతీ పనితీరును ఆదర్శంగా తీసుకోవాలని పేర్కొన్నారు. ఈ సందర్భంగా సర్పంచ్ ముక్కర రామకృష్ణారెడ్డి మాట్లాడుతూ నిర్మాణ పనులు సకాలంలో పూర్తి చేశామని, పని పూర్తయిన 15 రోజుల్లోనే బిల్లుల మొత్తం గ్రామ పంచాయతీ ఖాతాలో జమ అయ్యాయని తెలిపారు.