Trump @ NFT Collection | వావ్‌ డొనాల్డ్‌ ట్రంప్‌..! సూపర్‌ హీరో, ఆస్ట్రోనాట్‌గా దర్శనం

Trump @ NFT Collection | అమెరికా మాజీ అధ్యక్షుడు కొత్త రకం డిజిటల్‌ కార్డులకు తెరలేపారు. వివిధ ఆకారాల్లో తన ఫొటోలను ముద్రించిన కార్డులను ఎక్కువగా సేకరించిన వారికి సర్పరైజ్‌ ఇవ్వనున్నట్లు ట్రంప్‌ ప్రకటించారు. ఈ మొత్తాన్ని తన వద్దే ఉంచుకుంటానని స్పష్టం చేశారు.

Trump @ NFT Collection | అమెరికా మాజీ అధ్యక్షుడు డొనాల్డ్ ట్రంప్ తన స్వంత డిజిటల్ కార్డులను విడుదల చేశారు. వీటిలో సూపర్ హీరో, వ్యోమగామి వేషధారణలో ట్రంప్‌ కనిపిస్తున్నారు. ఈ కార్డుల ధర 99 డాలర్లు అంటే మన కరెన్సీలో 8 వేల రూపాయలు. వీటిని విక్రయించేందుకు, కస్టమర్లను ఆకర్షించేందుకు ట్రంప్ రకరకాల ఆఫర్లు ఇస్తున్నారు. అయితే, ట్రంప్‌ పనికి చాలా మంది చైల్డీష్‌ యాక్ట్‌ అని విమర్శిస్తుండగా.. ఇది ముమ్మాటికీ 2024 అమెరికా అధ్యక్ష ఎన్నికల పబ్లిసిటీ స్టంట్‌ అని ఇంకొందరు కొట్టిపారేస్తుండటం విశేషం.

డొనాల్డ్‌ ట్రంప్‌ డిజిటల్‌ ట్రేడింగ్‌ కార్డ్‌ల పేరుతో ఉన్న ఎన్‌ఎఫ్‌టీ కలెక్షన్లు మార్కెట్లోకి వచ్చాయి. ఈ కార్డులపై ట్రంప్‌ సూపర్ హీరో, వ్యోమగామి, ఓల్డ్ వెస్ట్ షెరీఫ్, నాస్కార్ డ్రైవర్‌తో పాటు ఇతర వ్యక్తుల వేషధారణలో కనిపిస్తున్నారు. గత ఏడాది స్థాపించిన సోషల్ మీడియా సైట్ ట్రూత్ సోషల్ ద్వారా ఈ ప్రకటన జారీ అయింది. ఎక్కువ కార్డులు కొని సేకరించే వ్యక్తులతో కలుస్తామని, వీడియో కాల్‌లు, ఆటోగ్రాఫ్‌లు, గోల్ఫ్‌ ఆడతామని.. ఇలా పలువురితో ట్రంప్‌ మాట్లాడుతున్నారు. 45 కార్డులను కొనుగోలు చేసే వ్యక్తులకు తన సౌత్ ఫ్లోరిడా రిసార్ట్‌లోకి ఎంట్రీ ఉంటుందని, పార్టీ పొందుతారని ట్రంప్ చెప్పారు. 45,000 ఫాంటసీ ఎన్‌ఎఫ్‌టీ టోకెన్లను 99 అమెరికన్‌ డాలర్లతో ముద్రించారు. వీటిని ఈథర్‌ లేదా ఫియట్‌ కరెన్సీతో కొనుగోలు చేయవచ్చు. ఈ డిజిటల్ కార్డుల అమ్మకం ద్వారా వచ్చే డబ్బును ఎన్నికల ప్రచారానికి వినియోగించనని ట్రంప్ స్పష్టం చేశారు.

ఇది ట్రంప్‌ చైల్డీష్‌ యాక్ట్‌..
ట్రంప్ విడుదల చేసిన డిజిటల్‌ కార్డులను ప్రజలు ఎగతాళి చేస్తున్నారు. చాలా మంది చైల్డీష్‌ యాక్ట్‌ అంటూ తీవ్రంగా విమర్శిస్తున్నారు. అమెరికా అధ్యక్ష పదవికి మరోసారి పోటీ చేయనున్నట్టు ప్రకటించిన ట్రంప్‌కు మీడియా కవరేజీ ఇవ్వకపోవడంతో దీనిని పబ్లిసిటీ స్టంట్ అని పలువురు వ్యాఖ్యానిస్తున్నారు.