Lovers Protest | కొత్త పెండ్లి కొడుక్కు ప్రియురాళ్ల ఝలక్‌‌.. వివాహ వేదిక ముందే యువతుల నిరసన..!

సరిగ్గా పెండ్లి కొడుకు, పెండ్లి కూతురు మెడలో తాళి కట్టే సమయానికి ఆ యువతి ఆపండి.. అనే మాటకు కొనసాగింపుగా ఆపండి.. ఆపండి.. ఆపండి.. అనే ప్రతిధ్వని వినిపిస్తుంది. ఆ తర్వాత పెండ్లి కొడుకు బండారం బయటపడి వివాహం అర్ధాంతరంగా ఆగిపోతుంది. అయితే..

బీజింగ్‌: పీటల మీద పెండ్లి ఆగిపోయిందనే మాట మనం తరచూ వింటుంటాం. నిజం జీవితంలో ఇలాంటి ఘటనలు అరుదుగా కనిపించినా, సినిమాల్లో మాత్రం చాలాసార్లు చూసి ఉంటాం. వైభవంగా వివాహ వేడుక జరుగుతుండగా సరిగ్గా పెండ్లి కొడుకు, పెండ్లి కూతురు మెడలో తాళి కట్టే సమయానికి ఓ యువతి ఆపండి.. అనే మాటకు కొనసాగింపుగా ఆపండి.. ఆపండి.. ఆపండి.. అనే ప్రతిధ్వని వినిపిస్తుంది. ఆ తర్వాత పెండ్లి కొడుకు బండారం బయటపడి వివాహం అర్ధాంతరంగా ఆగిపోతుంది.

అయితే, సినిమాల్లో తరచుగా కనిపించే ఈ తరహా ఘటనకు పదింతలు రెట్టింపయిన ఘటన తాజాగా చైనాలోని యునాన్‌ చోటుచేసుకుంది. ఘనంగా వివాహ వేడుక మొదలైంది. బంధుమిత్రుల సందడితో ఆ పరిసరాలన్నీ కళకళలాడుతున్నాయి. సరిగ్గా అప్పుడే ఒక్కరు కాదు, ఇద్దరు కాదు, ముగ్గురు కాదు ఏకంగా కొంతమంది యువతుల గ్రూపే అక్కడికి చేరుకుంది.

రాగానే తమ వెంట తెచ్చుకున్న భారీ ఎరుపు రంగు బ్యానర్‌ను ప్రదర్శించింది. దానిపై ‘తాము పెండ్లి కొడుకు చెన్‌ మాజీ ప్రియురాళ్లం. ఈ రోజు మేం ఈ వివాహాన్ని చెడగొడుతాం’ అని రాసి ఉంది. ఇది చూసి బంధువులు ఆ మగువలను ఆరా తీయడం మొదలుపెట్టారు. వారు చెన్‌ తమను మోసం చేశాడని చెప్పడంతో విషయం కాసేపట్లో పెండ్లికి హాజరైన అందరికీ తెలిసిపోయింది. దాంతో పెండ్లి కూతురు, ఆమె పేరెంట్స్‌ ఆగ్రహంతో ఊగిపోయారు.

కథ ఏందంటూ పెండ్లి కొడుకును నిలదీశారు. దాంతో అతడు అబద్ధం చెప్పకుండా నిజం ఒప్పుకున్నాడు. వాళ్లంతా తన మాజీ ప్రియురాళ్లేనని, టీనేజ్‌లో తాను కొంచెం కొంటెగా ఉండేవాడినని, ఆ క్రమంలో చాలా మంది అమ్మాయిలను బాధపెట్టానని, ఇప్పుడు పూర్తిగా మారిపోయానని చెప్పాడు. నిరసనకు దిగిన తన మాజీ ప్రియురాళ్లను క్షమాపణ కోరాడు.

పెండ్లి కొడుకు నిజాయితీకి పెండ్లి కూతురు, ఆమె పేరెంట్స్‌ ఫిదా అయ్యారు. క్షమాపణ కోరడంతో అతని మాజీ ప్రియురాళ్లలో కూడా కోపం చల్లారింది. దాంతో ఏ అడ్డంకి లేకుండా పెండ్లి జరిగిపోయింది. కాగా, దీనిపై రకరకాల కామెంట్లు వస్తున్నాయి. చిరుతపులి మచ్చలు మారవని పెండ్లి కొడుకును ఉద్దేశించి ఓ నెటిజన్‌ కామెంట్‌ చేశాడు. పెళ్లి కూతరు స్థానంలో తానుంటే వెంటనే విడాకులు ఇచ్చేదాన్నని ఓ యువతి కామెంట్‌ పెట్టింది.