కాబూల్: తాలిబన్లు ఏ మాత్రం మారలేదన్నదానికి ఈ ఘటన ఉదాహరణగా నిలుస్తున్నది. ఒక సంగీతకారుడ్ని కొట్టి అతడి వాయిద్య పరికరాన్ని ధ్వంసం చేసి నిప్పుపెట్టారు. మంటల్లో కాలిపోతున్నవాయిద్య పరికరాన్ని చూసి ఒకవైపు బాధతో ఆ సంగీతకారుడు విలపిస్తుండగా, తుపాకులు ధరించిన తాలిబన్లు మాత్రం దీనిని చూసి పైశాచిక ఆనందం పొందారు. నవ్వుతూ తమ మొబైల్లో వీడియోలు రికార్డ్ చేశారు. ఆఫ్ఘనిస్థాన్లోని పాక్టియా ప్రావిన్స్లో ఈ ఘటన జరిగింది. అబ్దుల్హక్ ఒమెరి అనే జర్నలిస్ట్ ఈ వీడియోను ట్విట్టర్లో పోస్ట్ చేయగా వైరల్ అయ్యింది.
గత ఏడాది ఆగస్ట్లో ఆఫ్ఘనిస్థాన్ను మరోసారి తమ నియంత్రంలోకి తెచ్చుకున్న తాలిబన్లు మళ్లీ ఆటవిక పాలన సాగిస్తున్నారు. ఇస్లామిక్ రాజ్యంగా ప్రకటించిన తాలిబన్లు షరియా చట్టం పేరుతో ఆ దేశ ప్రజలు, ప్రత్యేకించి మహిళలపై కఠిన ఆంక్షలు విధించారు. వాహనాలు, వివాహా వేడుకల్లో మ్యూజిక్ను నిషేధించారు. పలు సంగీత వాయిద్యాలు, టీవీలను కూడా గతంలో ధ్వంసం చేశారు. పురుషులు, స్త్రీలు వేర్వేరు వేదికలలో వివాహాలు జరుపుకోవాలని ఆదేశించారు.