Sheep Heads | ఈజిప్ట్‌ ఆలయం కింద.. బయటపడిన వేలాది గొర్రెల తలలు

Sheep Heads | ఒక ఆలయం కింద సుమారు రెండు వేలకు పైగా గొర్రె తలల (Sheep Heads) మమ్మీలు బయటపడ్డాయి. ఈజిప్ట్‌ పర్యాటక, పురాతన వస్తువుల మంత్రిత్వ శాఖ ఆదివారం ఈ విషయం తెలిపింది. ఫారో రామ్‌సెస్ II ఆలయంలో నైవేద్యంగా ఉంచిన మమ్మీ చేసిన గొర్రెల తలలను పురావస్తు శాస్త్రవేత్తలు కనుగొన్నట్లు పేర్కొంది.

కైరో: మమ్మీలకు ప్రసిద్ధి చెందిన ఈజిప్ట్‌లో చేపట్టిన తవ్వకాల్లో కొత్త వాటిని గుర్తించారు. ఒక ఆలయం కింద సుమారు రెండు వేలకు పైగా గొర్రె తలల (Sheep Heads) మమ్మీలు బయటపడ్డాయి. ఈజిప్ట్‌ పర్యాటక, పురాతన వస్తువుల మంత్రిత్వ శాఖ ఆదివారం ఈ విషయం తెలిపింది. ఫారో రామ్‌సెస్ II ఆలయంలో నైవేద్యంగా ఉంచిన మమ్మీ చేసిన గొర్రెల తలలను పురావస్తు శాస్త్రవేత్తలు కనుగొన్నట్లు పేర్కొంది. దక్షిణ ఈజిప్టులోని దేవాలయాలు, సమాధులకు ప్రసిద్ధి చెందిన అబిడోస్ వద్ద అమెరికాకు చెందిన పురావస్తు శాస్త్రజ్ఞుల బృందం వీటిని వెలికి తీసినట్లు పేర్కొంది. కుక్కలు, మేకలు, ఆవులు, గజెల్స్, ముంగిస మమ్మీలు కూడా తవ్వకాల్లో బయటపడినట్లు వెల్లడించింది.

కాగా, క్రీస్తు పూర్వం 1304 నుంచి 1237 వరకు దాదాపు ఏడు దశాబ్దాల పాటు ఈజిప్టును రామ్‌సెస్‌ II పాలించారు. ఆయన మరణాంతరం వెయ్యి ఏళ్ల తర్వాత జరిగిన ఆరాధన ఉత్సవాల్లో భాగంగా వేల సంఖ్యలో గొర్రెలు, మేకలు, ఆవులు, కుక్కలు వంటి జంతువులను బలి ఇచ్చి నైవేద్యం కోసం మమ్మీలుగా చేసి ఉంటారని అమెరికన్ మిషన్ అధిపతి సమేహ్ ఇస్కందర్ తెలిపారు. మమ్మీలుగా చేసిన జంతువుల అవశేషాలతోపాటు సుమారు 4,000 సంవత్సరాలు కిందట నిర్మించిన ఐదు మీటర్ల మందం (16 అడుగుల) గోడలతో కూడిన ప్యాలెస్ శిథిలాలు, అనేక విగ్రహాలు, పాపిరి, పురాతన చెట్ల అవశేషాలు, తోలు బట్టలు, బూట్లు వంటి వాటిని కూడా కనుగొన్నట్లు చెప్పారు.

మరోవైపు 2374 నుంచి 2140 బీసీ మధ్య, 323 నుంచి 30 బీసీ నాటి టోలెమిక్ కాలం నాటి నిర్మాణాలు, రామ్‌సెస్ II ఆలయం, అక్కడ జరిగిన కార్యకలాపాల గురించి మరింత తెలుసుకునేందుకు ఈ ఆవిష్కరణలు సహాయపడతాయని ఈజిప్ట్‌లోని పురాతన పురాతన వస్తువుల సుప్రీం కౌన్సిల్ అధిపతి మోస్తఫా వాజిరి తెలిపారు.