ఫ్లోరిడా: అమెరికాలోని ఫ్లోరిడా దిశగా హరికేన్ ఇయాన్ బలంగా ముందుకు వెళ్తోంది. దీంతో అక్కడ వేగంగా ప్రజల్ని సురక్షిత ప్రాంతాలకు తరలిస్తున్నారు. చాలా తీవ్రమైన రీతిలో వర్షాలు కురిసే అవకాశాలు ఉన్నాయి. ఇయాన్ను ప్రస్తుతం రెండవ క్యాటగిరీ హరికేన్గా ప్రకటించారు. మియామిలోని జాతీయ హరికేన్ సెంటర్ ఇయాన్ కదలికల్ని పరీక్షిస్తోంది. క్యూబాకు పశ్చిమ దిశలో సుమారు 150 మైళ్ల దూరంలో ఇయాన్ కేంద్రీకృతమై ఉందని నేషనల్ హరికేన్ సెంటర్ తెలిపింది. మంగళవారం నుంచి హరికేన్ ఇయాన్ ప్రభావం ఫ్లోరిడాపై పడే సూచనలు ఉన్నాయి. మోస్తారు నుంచి శక్తివంతమైన హరికేన్గా మారే అవకాశాలు ఉన్నట్లు వాతావరణశాఖ అధికారులు తెలిపారు. క్యూబాలో ఇవాళ్టి నుంచి భారీ వర్షాలకు కురిసే ప్రమాదం ఉంది. జమైకా, క్యూబా దేశాల్లో హరికేన్ ఇయాన్ వల్ల ఆకస్మిక వరదలు వచ్చే ఛాన్సు ఉంది. కొండచరియలు కూడా విరిగిపడనున్నాయి. క్యూబాలోని పినార్ డెల్ రియో ప్రావిన్సు నుంచి 19 వేల మందిని సురక్షిత ప్రాంతాలకు తరలించారు.