న్యూయార్క్: అమెరికాలోని అలస్కాలో (Alaska) ఆర్మీకి చెందిన రెండు హెలికాప్టర్లు కుప్పకూలాయి. శిక్షణలో భాగంగా రెండు ఆర్మీ హెలికాప్టర్లు (Army helicopters) ఒక్క సారిగా కూలిపోయాయని, రెండు హెలికాప్టర్లలో ఇద్దరు చొప్పున ఉన్నారని యూఎస్ ఆర్మీ ప్రతినిధి జాన్ పెన్నెల్ (John Pennell) తెలిపారు. శిక్షణ ముగించుకుని తిరిగి వస్తుండగా ఈ ప్రమాదం చోటుచేసుకుందని వెల్లడించారు. అలస్కాలో ఆర్మీ హెలికాప్టర్లు కూలిపోవడం ఈ ఏడాది ఇది రెండోసారి.
అయితే ఈ ప్రమాదం గురించి పూర్తిస్థాయి సమాచారం ఇంకా అందలేదని చెప్పారు. ఈ ఘటనపై విచారణ జరుపుతున్నామన్నారు. ఏహెచ్-64 అపాచీ హెలికాప్టర్లు (AH-64 Apache helicopters) కూలిపోయినట్లు తెలుస్తున్నదని వెల్లడించారు. ఈ ఏడాది ఫిబ్రవరిలో టాల్కీత్నా నుంచి టేకాఫ్ అయిన కొద్దిసేపటకే అపాచీ హెలికాప్టర్ కూలడంతో ఇద్దరు సైనికులు గాయపడ్డారు.