మేడ్చల్, ఏప్రిల్ 23(నమస్తే తెలంగాణ): మహిళా ఆరోగ్య పథకం మహిళలకు వరంగా మారనుంది. రాష్ట్ర ప్రభుత్వం ఈ పథకం ద్వారా మహిళలకు ప్రతి మంగళవారం పలు వైద్య పరీక్షలను ఉచితంగా నిర్వహించనుంది. ఇందుకు మేడ్చల్-మల్కాజిగిరి జిల్లా వ్యాప్తంగా 58 ప్రభుత్వ దవాఖానల్లో మహిళా ఆరోగ్య పథకం సేవలను త్వరలోనే ప్రారంభించనున్నారు. జిల్లాలోని మేడ్చల్, మల్కాజిగిరి, ఉప్పల్, కూకట్పల్లి, కుత్బుల్లాపూర్ నియోజకవర్గాల్లోని 58 ప్రభుత్వ దవాఖానలను జిల్లా వైద్య శాఖ మొదటి దశలో ఎంపిక చేసింది. మహిళలు ప్రధానంగా ఎదుర్కొనే పలు రకాల అనారోగ్య సమస్యలకు వైద్యం అందించేందుకు వైద్య సౌకర్యాలను ఎంపిక చేసి పీహెచ్సీ, యూపీహెచ్సీ, బస్తీ దవాఖానల్లో ఏర్పాట్లు చేస్తున్నారు. రెండు, మూడు రోజుల్లో మహిళా ఆరోగ్య పథకం వైద్య సేవలను ప్రభుత్వ ఆదేశాల మేరకు అందుబాటులోకి తీసుకురానున్నారు. ఇప్పటికే మహిళలకు అందించే వైద్యంపై వైద్యులకు, సిబ్బందికి శిక్షణనిచ్చారు. వైద్య సేవల కోసం వచ్చే మహిళలు ఇబ్బందులు పడకుండా హెల్ప్డెస్క్ను ఏర్పాటు చేయనున్నారు.
మధుమేహం, రక్తపోటు, రక్తహీనత ఇతర సాధారణ పరీక్షలు, ఓరల్ సర్వైకల్, రొమ్ము క్యాన్సర్ల స్క్రీనింగ్, థైరాయిడ్ పరీక్ష, సూక్ష్మ లోపాలను గుర్తించడం, అయోడిన్ సమస్య, ఫోలిక్ యాసిడ్, ఐరన్ లోపంతో పాటు మిటమిన్ బీ12, విటమిన్ డీ పరీక్షలు చేసి చికిత్స చేసిన తరువాత మందులు అందజేస్తారు. మూత్రకోశ సంబంధిత ఇన్ఫెక్షన్, పెల్విక్ ఇన్ప్లమేటరీ వ్యాధుల పరీక్షలు, మొనోపాజ్ దశకు సంబంధించి పరీక్షలు నిర్వహించి అవసరమైన వారికి హర్మోన్ రీప్లేస్మెంట్ థెరపీ చేయడంతో పాటు కౌన్సెలింగ్ నిర్వహిస్తారు. నెలసరి సంతాన సమస్యలపై ప్రత్యేక్షంగా పరీక్షలు చేసి వైద్యంతో పాటు అవగాహన కల్పిస్తారు. అవసరమైన వారికి అల్ట్రాసౌండ్ పరీక్షలు చేస్తారు.
జిల్లాలో త్వరలోనే ప్రారంభం కానున్న మహిళా ఆరోగ్య పథకాన్ని మహిళలు సద్వినియోగం చేసుకోవాలి. ప్రభుత్వం మహిళల ఆరోగ్యం పట్ల ప్రత్యేక శ్రద్ధ పెట్టి ఈ పథకాన్ని తీసుకొచ్చింది. ఇందుకు సంబంధించి వైద్య పరికరాలను ఎంపిక చేసిన 58 దవాఖానల్లో సమకూర్చుతున్నాం. మహిళలకు పరీక్షల నిర్వహణ అనంతరం అవసరమైన వారికి మందులను అందజేస్తాం. మహిళా ఆరోగ్య పథకం కింద ఎంపిక చేసిన దవాఖానలకు వచ్చే మహిళల వివరాలను ప్రత్యేక యాప్లో పొందపర్చనున్నారు. అలాగే గర్భిణులకు న్యూట్రీషియన్ కిట్లను త్వరలోనే అందించనున్నాం. మొదటి దశలో జిల్లా వ్యాప్తంగా 6 ప్రభుత్వ దవాఖానల్లో ప్రారంభించనున్నాం. – – పుట్ల శ్రీనివాస్, వైద్యాధికారి, మేడ్చల్-మల్కాజిగిరి జిల్లా