సిటీబ్యూరో, జూన్ 23 (నమస్తే తెలంగాణ): డ్రగ్స్ కేసులో పట్టుబడిన కబాలి సినీ నిర్మాత కేపీ చౌదరి పోలీసుల విచారణలో పలు కీలక అంశాలు వెల్లడించినట్లు తెలిసింది. ముఖ్యంగా 12 మందికి డ్రగ్స్ విక్రయించినట్లు విచారణలో వెల్లడించినట్లు తెలిసింది. అంతే కాకుండా.. బిగ్బాస్లో పాల్గొన్న ఒక హీరోయిన్తో పాటు టాలీవుడ్లో ఐటమ్ సాంగ్ చేసిన మరో హీరోయిన్కు కూడా నిందితుడు డ్రగ్ సరఫరా చేసినట్లు విచారణలో అంగీకరించినట్లు సమాచారం. విశ్వసనీయ సమాచారం మేరకు పోలీసు విచారణ వివరాలు ఇలా ఉన్నాయి. 11 మందితో అనుమానాస్పద బ్యాంక్ లావాదేవీలు జరిపాడు. ఆ లావాదేవీలను పోలీసులు పరిశీలిస్తున్నారు. ఒక పబ్ యజమానితో కూడా ఎక్కువ సార్లు మాట్లాడినట్టు గుర్తించారు. మరింత సమాచారం రాబట్టేందుకు చౌదరికి సంబంధించిన కాల్స్ను పోలీసులు దర్యాప్తులో భాగంగా డీకోడ్ చేస్తున్నారు.
సినీ పరిశ్రమంతో పాటు కొందరు వ్యాపారులు, నాయకుల పిల్లలకు డ్రగ్స్ సరఫరా చేసినట్లు కేపీ చౌదరి పోలీసు విచారణలో వెల్లడించినట్లు వస్తున్న వార్తలతో టాలీవుడ్లో కలకలం మొదలైంది. డ్రగ్స్ కేసులో ఈనెల 14న అరెస్టయిన చౌదరిని ఈనెల 21న కోర్టు అనుమతితో రాజేంద్రనగర్ పోలీసులు కస్టడిలోకి తీసుకున్న విషయం తెలిసిందే. కస్టడిలో భాగంగా పోలీసులు జరిపిన విచారణలో నిందితుడు పైవిషయాలను వెల్లడించినట్లు తెలిసింది. అయితే, పోలీసులు మాత్రం ఈ విషయాలను ధ్రువీకరించడంలేదు.