Visit:
Hyderabad | సిటీబ్యూరో, నవంబర్‌ 28(నమస్తే తెలంగాణ): అంబర్‌పేట ఎస్‌ఐ భానుప్రకాశ్‌కు సంబంధించిన 9 ఎంఎం సర్వీస్‌ రివాల్వర్‌ మిస్సింగ్ వ్యవహారం ఇప్పటికీ కొలిక్కి రాలేదు. విజయవాడలో ఓ లాడ్జిలో తాను చదువుకునే పుస్తకాల దగ్గర పెట్టుకున్నప్పుడు అది మిస్‌ అయిందంటూ ఎస్‌ఐ చెప్పడంతో హైదరాబాద్‌ పోలీసులు విజయవాడలోని లాడ్జి, అందులో పనిచేసే బాయ్స్‌, హోటల్‌ యజమానిని ప్రశ్నించారు. సీసీటీవీ ఫుటేజ్‌ కూడా పరిశీలించారు. తుపాకీకి సంబంధించిన ఆనవాళ్లు కనిపించలేదు.. అసలు ఆ తుపాకీ వ్యవహారమేంటో తమకు తెలియదని లాడ్జి యాజమాన్యం చెప్పినట్లు సమాచారం. బెట్టింగ్‌ బాబు భాను ప్రకాశ్‌ తన జల్సాల కోసం తుపాకీని అమ్మేశాడంటూ ఆయన బ్యాచ్‌మేట్స్‌ చెప్పుకుంటున్నారు.
తాను ట్రైనింగ్‌ తీసుకునే సమయంలో కూడా విపరీతంగా బెట్టింగ్‌ ఆడేవాడని, ఆ తర్వాత తన ఇంట్లో బంగారం తీసుకొచ్చి కూడా బెట్టింగ్‌లో పెట్టాడని ఆయన సహచరులు చెప్పారు. ఏపీలో తనకు పీసీబీలో ఉద్యోగం వచ్చిన తరువాత అందులో జాయిన్‌ కావాలంటే ఇక్కడ ఎన్‌ఓసీ తీసుకోవాలని అందుకోసం ఇక్కడకు వచ్చి తన డ్రాలో చూసుకుని రివాల్వర్‌ కనిపించడం లేదని చెప్పడం, ఆ తర్వాత తన వెంటనే తీసుకెళ్లి తుపాకీని విజయవాడ లాడ్జి మరిచిపోయినట్లు చెప్పడం.. ఇలా పొంతన లేని మాటలతో కాలయాపన చేస్తున్నారు.. టాస్క్‌ఫోర్స్‌ను ఉరికిస్తున్నారు తప్ప అసలు రహస్యం ఇప్పటికీ భానుప్రకాశ్‌ నోటివెంట బయటకు రావడం లేదు. ఇప్పటికే ఆ తుపాకీ ఎన్ని చేతులు మారిందనేది ప్రస్తుతం పోలీస్‌శాఖలో చర్చనీయాంశంగా మారింది.
ముఖ్యంగా తుపాకీ కుదువ పెట్టి మొదట్లో ఐదు లక్షలు తెచ్చుకున్న తర్వాత మళ్లీ పైసల కోసం వెళ్తే అది అమ్మేస్తానని చెప్పడంతో ఆ తుపాకీని రాయలసీమ గ్యాంగ్స్‌కు అమ్మేసినట్లుగా ప్రచారం జరుగుతుంది. ఇందులో ఎంత నిజముందో తెలుసుకోవడానికి పోలీసులు ప్రయత్నించినా చిన్న క్లూ కూడా దొరకడం లేదని ఓ సీనియర్‌ ఆఫీసర్‌ చెప్పారు. అసలు సర్వీస్‌ రివాల్వర్‌ విషయంలో ఇంత నిర్లక్ష్యంగా ఉంటారా అంటూ పోలీసులే మాట్లాడుకుంటున్నారు. మరోవైపు సస్పెన్షన్‌కు గురైన అధికారుల నుంచి సర్వీస్‌ గన్స్‌ స్వాధీనం చేసుకోవడం లేదని తెలుస్తుంది. 9ఎంఎం పిస్టల్‌కు సంబంధించి బుల్లెట్లు కూడా బయట దొరకవని పోలీసులు అనుకుంటున్నారు. ఏదేమైనా గన్‌ మిస్సింగ్ వ్యవహారం పోలీసులకు పెద్ద సవాల్‌గా మారింది.
భానుప్రకాశ్‌ ఓ బంగారం రికవరీ కేసులో బంగారాన్ని అమ్ముకున్న ఘటనలో సస్పెండ్‌ అయ్యారు. కాగా ఇటీవల తనకు ఏపీలో ఉద్యోగం వచ్చిందని చెప్పి నో ఆబ్జెక్షన్‌ సర్టిఫికెట్‌ కోసం వచ్చారు. అయితే తన డ్రాలో సర్వీస్‌ రివాల్వర్‌ కనిపించడం లేదంటూ ఉన్నతాధికారికి చెప్పడంతో ఆయన అవాక్కై వెంటనే తన పై అధికారులకు సమాచారమిచ్చారు. భానుప్రకాశ్‌ తన సర్వీస్‌ రివాల్వర్‌ను సస్పెండ్‌ అయిన వెంటనే సంబంధిత పోలీస్‌స్టేషన్‌లో లేదా ఆర్మ్స్‌ ప్రిజర్వ్‌ చేయాల్సిన చోట అప్పగించాల్సి ఉండగా అలా చేయకుండా తీసుకెళ్లడంపై పలు అనుమానాలు తలెత్తుతున్నాయి. ఆయన విధుల్లో ఉన్నప్పుడే తుపాకీ కనిపించకుండా పోయిందనే చర్చకూడా జరుగుతుంది.
ఇక్కడ ఉన్నప్పుడు ఎప్పుడూ రెగ్యులర్‌గా డ్యూటీకి రాకపోవడంతో సీనియర్లు కూడా ఆయన విషయంలో పట్టీపట్టనట్లుగా ఉండడమే ఈ పరిస్థితికి కారణమంటూ ఉన్నతాధికారులు చెబుతున్నారు. ఒకవైపు తన ర్యాక్‌లో బుల్లెట్లు అలాగే ఉంచి రివాల్వర్‌ తీసుకెళ్లడంలో కూడా బెట్టింగ్‌ కారణమేనని తెలుస్తోంది. తోటి పోలీసులతో పాటు మరికొందరి దగ్గర సుమారుగా రూ.60లక్షల వరకు భానుప్రకాశ్‌ అప్పులు చేశారని వారంతా పోలీసు ఉన్నతాధికారులకు చెప్పినట్లు సమాచారం. ఇంతకూ తుపాకీ విజయవాడలో లేక, తన స్టేషన్‌లో అప్పగించక.. ఎటు పోయిందనే విషయంలో పోలీసులు తలలు పట్టుకుంటున్నారు. ఇప్పటికే గన్‌ మిస్సింగ్‌తో శాఖ పరువు పోతుంటే గన్‌ దొరకకపోవడంతో సీపీ సజ్జనార్‌ సీరియస్‌ అవుతున్నారు. మిస్‌ అయిన తుపాకీ ఎవరి చేతికి చేరిందనే కోణంలో టాస్క్‌ఫోర్స్‌ పెద్ద ఎత్తున ఆపరేషన్‌ చేస్తుంటే ఇప్పటికీ గన్‌ పోయిన విషయంపై భానుప్రకాశ్‌లో చిన్న పశ్చాత్తాపం కూడా లేదని ఓ అధికారి చెప్పారు.
ముఖ్యంగా భానుప్రకాశ్‌ డ్యూటీలో ఉన్నప్పుడే గన్‌ మిస్సింగ్ వ్యవహారం జరిగిందేమోనంటూ పోలీసులు అనుమానిస్తున్నారు. శుక్రవారం పోలీస్‌ కమిషనరేట్‌ పరిధిలోని అన్ని జోన్ల అధికారులతో సీపీ సజ్జనార్‌ నిర్వహించిన నెలవారి క్రైమ్‌ సమీక్ష సమావేశంలో గన్‌ మిస్సింగ్‌పై చాలా సీరియస్‌ అయినట్లు తెలిసింది. సంబంధిత జోన్‌ అధికారులను ఆదేశిస్తూనే టాస్క్‌ఫోర్స్‌ సిబ్బందిని కూడా ఒత్తిడి చేశారని సమాచారం. ముఖ్యంగా ప్రతి ఆఫీసర్‌ డ్యూటీలో ఉన్నప్పుడు సర్వీస్‌ రివాల్వర్‌ వెంట పెట్టుకోవాలని, ప్రతి పదిహేనురోజుకోసారి వెపన్‌ డ్రిల్‌ నిర్వహించాలని ఆదేశించారు.
