మనిషి శరీరంలో కీలకమైన అవయవం గుండె. హృదయం సరిగ్గా పని చేస్తేనే మనం సంపూర్ణ ఆరోగ్యంతో ఉన్నట్టు. పెరుగుతున్న ఒత్తిళ్లు, అనారోగ్యకరమైన ఆహారపు అలవాట్లు, జీవనశైలి మార్పులు తదితర కారణాలు గుండెకు చేటు చేస్తున్నాయి. నడివయసుకు చేరుకోకముందే హృదయం తన విధుల్లో విఫలమవుతున్నది. యువతరం సైతం ప్రాణాపాయాన్ని ఎదుర్కొంటున్నది. ఇలాంటి పరిస్థితుల్లో గుండెకు మేలుచేసే యోగాసనాలు కొన్ని ఉన్నాయి. శ్వాస సరిగ్గా ఆడితేనే శరీరంలో ఆక్సిజన్ స్థాయులు తగినంతగా ఉంటాయి. దీనికోసం వ్యాఘ్ర శ్వాస ఆసనం సాధన చేయాలి. తాడాసనం, అర్ధకటి చక్రాసనం, వృక్షాసనం, భుజంగాసనం, వక్రాసనం గుండెకు మేలుచేస్తాయి. శవాసనం కూడా సాంత్వన చేకూరుస్తుంది. అయితే, హృద్రోగాలు ఉన్నవాళ్లు శలభాసనం, ధనురాసనం వేయకూడదు. నిపుణుల వైద్య సలహా తర్వాతే యోగా ప్రారంభించడం ఉత్తమం. అదీ నిపుణుల పర్యవేక్షణలోనే సాధన చేయడం క్షేమకరం. సొంత ప్రయోగాలు అనర్థదాయకం.