Childhood obesity | చిన్నారుల్లో ఊబకాయం కారణాలు, ప్రభావాలు.. ఎలా ఉంటాయంటే..?

Childhood obesity | చిన్నారుల్లో ఊబకాయం పెరిగిపోతూ కలవరపెడుతున్నది. శారీరక శ్రమ లేకపోవడంతో పాటు మరెన్నో జీవనశైలి కారణాలు ఇందుకు దోహదపడుతున్నాయి. ఒబెసిటీతో ఎన్నో ఆరోగ్య సమస్యలు ఉంటాయని..

Childhood obesity | మన జీవనశైలి నానాటికి మారిపోతున్నది. ఫలితంగా ఒబేసిటీ, డయాబెటీస్‌, బీపీ వంటి ఆరోగ్య సమస్యలకు దారితీస్తుంది. ఇటీవలి కాలంలో పిల్లల్లో అతి బరువు సమస్య ఎక్కువగా కనిపిస్తున్నది. 5 సంత్సరాల కంటే తక్కువ వయస్సు ఉన్న చిన్నారుల్లో ఊబకాయం సమస్య తీవ్రమవుతుండటం ఆందోళన కలిగిస్తున్నది. చిన్నారుల్లో ఊబకాయం రావడానికి కారణాలు ఏంటో.. వాటి ప్రభావాలు ఎలా ఉంటాయో తెలుసుకోవడం చాలా ముఖ్యం.

కారణాలు..
జీన్స్‌ : మన దేశీయుల్లో ఊబకాయం రావడానికి ముఖ్య కారణం జన్యువులు అని శాస్త్రవేత్తలు ఏనాడో గుర్తించారు. కుటుంబంలో ఎవరైనా ఒబేసిటీతో ఉన్నట్లయితే ఆ కుటుంబంలోని పిల్లలకు కాలక్రమేణా ఊబకాయం వచ్చే అవకాశాలు ఉంటాయి.

డైట్ : చిన్నారులు ఎక్కువగా బయటి ఆహారాలు ముఖ్యంగా ఫాస్ట్‌ఫుడ్స్‌, ప్రాసెస్డ్‌ ఫుడ్స్ తింటున్నారు. ఇవి బరువు పెరిగేందుకు దోహదపడతాయి. అలాగే, కృత్రిమ చక్కెరలు ఉండే పానీయాలను తీసుకోవడం కూడా ఒక కారణంగా చెప్పుకోవచ్చు.

లైఫ్‌స్టైల్‌ : ప్రస్తుత కాలంలో పిల్లలు వీడియో గేమ్‌లు ఆడటం, మొబైల్స్‌ వాడటం ఎక్కువగా ఉన్నది. ఇవి పిల్లల్ని శారీరక శ్రమ లేకుండా చేసి సోమరిపోతుల్లా తయారు చేస్తున్నాయి. ఫలితంగా లావెక్కుతున్నారు.

ఆరోగ్య సమస్యలు..
ఊబకాయం అనేక దీర్ఘకాలిక ఆరోగ్య సమస్యలకు దారితీస్తుంది. టైప్ 2 డయాబెటీస్‌, హై బీపీ, కొలెస్ట్రాల్, ఆర్థరైటిస్, శ్వాసకోశ సమస్యలు, జీర్ణ సమస్యలు, స్ట్రోక్, గుండె జబ్బులను కలుగజేస్తుంది.

ముగ్గురిలో ఇద్దరు పిల్లలు జీవితాంతం ఊబకాయంతో ఉంటున్నారని ఒక అధ్యయనంలో తేలింది.

ఇలా నివారిద్దాం..

• పిల్లలను ఎక్కువసేపు శక్తివంతంగా ఉంచేందుకు ఫైబర్, ప్రోటీన్‌లతో కూడిన అల్పాహారం ఇవ్వాలి.
• ఒకేసారి ఎక్కువగా భోజనం చేయడానికి బదులు స్మాల్‌ మీల్స్‌ అలవాటు చేయాలి.
• చిన్నారులు అదనంగా ఆహారాలు తినకుండా చూడాలి.
• వివిధ రకాల సీజనల్ పండ్లు, కూరగాయలు తినేలా చేయాలి.
• భోజనాలు చేయమని మారం చేసే వారికి సూప్‌లు, జ్యూస్‌ల రూపంలో ఇవ్వాలి.
• నెమ్మదిగా తినడం అలవర్చుకునేలా చేయాలి.
• తినేప్పుడు టీవీ చూడకుండా లేదా స్మార్ట్‌ఫోన్‌లను ఉపయోగించకుండా పిల్లల్ని పరిమితం చేయాలి.
• చక్కెర ఎక్కువగా తీసుకోవడం చూడాలి.
• సహజ చక్కెరలు ఉండే పానీయాలు తాగకుండా కనిపెట్టాలి.
• ప్రతిరోజూ ఏదో ఒక ఆట ఆడేలా ప్రోత్సహించాలి.

గమనిక: ఈ కథనం కేవలం పాఠకుల అవగాహన కోసమే అందిస్తున్నాం. ఆరోగ్యానికి సంబంధించి ఏ సమస్యకైనా వైద్యులను సంప్రదించడం శ్రేయస్కరం.