Visit:
లుప్తమైన రాజనీతి కాలంలో
రాజ్యం వాచ్య రాజకీయాలదే!
అందరి పలవరింత ఒకటే
ఫలించని కల ఒకటే!
ఆసేతు హిమాచలం
పాదక్రాంతం కావడమే!
ఒకే దేశం ఒకే పార్టీ
చెరగని అందమైన నినాదం!
ప్రజాస్వామ్య స్ఫూర్తి
అడుగడుగున పరిహాసం!
ఎవరి మనసులో ఏముందో
వారి వారి మాటల్లో వాచ్యమే!
విడివిడిగా ఉంటే
ఎవరి కల సాకారం కాదు!
చేయి కలిపి చూడు నాతో
నీ ఊరేగింపు ఊహకందదు!
ఓపెన్ ఆఫర్ కడు సూపర్
ఇష్టమున్న మాటల్తో ముసుగు!
పెద్దాయన అన్ని మెట్లు దిగొచ్చి
ఆశ చూపిన దృశ్యం స్పష్టం!
ఎంతైనా ఇది రుచి మరిగిన చేప
అతను వల విసరడమే తరువాయి!
విశాల భారతావనిలో ఇప్పుడు
తెలంగాణ ఓ బంగారు చేప!
అదను కొరకు వేటగాళ్లు
వలలు సిద్ధం చేసుకుంటున్నారు!
మన కల నిజం చేసిన యోధుల్లారా
పహారా హుషార్!
ప్రమాదం రెక్క విప్పక మునుపే
సకల జనులను సిద్ధం చేయండి!!
– కోట్ల వెంకటేశ్వరరెడ్డి
94402 33261
