పాంచజన్యం పూరించడమే!

మన నేల మీద మళ్లీ పల్లేరు మొలకల జాడలు నిశ్శబ్దంగా పరచుకుంటున్న కరువు నీడలు

మన నేల మీద
మళ్లీ పల్లేరు మొలకల జాడలు
నిశ్శబ్దంగా పరచుకుంటున్న
కరువు నీడలు

మరోసారి పట్నం వైపు
పల్లెల వలస చూపులు
ఆకుపచ్చ తెలంగాణ దృశ్యం
కనుమరుగయ్యే కుట్ర

సాధించుకున్న స్వేచ్ఛ వెనుక
పరాయి జెండా రెపరెపలు
భ్రమలు ఒక్కొక్కటిగా మంచు తెరలై
కనుమరుగవుతున్న విషాద కాలం
శకుని మాయాజూదం
చివరి అంకానికి చేరుకున్న వికృత క్రీడ

ఏకమై కొత్త కొత్త కుట్రలకు
జట్లు జట్లుగా దుష్టచతుష్టయం ఆజ్యం
నీటి దొంగలకు ఇంటి దొంగల తోడు
మాన్పుకొన్న గాయాలను
గెలికి బాధిస్తున్న దుర్మార్గం

యుద్ధం తప్పనప్పుడు సాధకుడు
పాంచజన్యం పూరించాల్సిందే!
మౌనం ఎంత శక్తిమంతమో
చరిత్రలో ఒక పాఠమై నిలిచిపోవాలి!!

– కోట్ల వెంకటేశ్వరరెడ్డి
9440233261