ఔను.. ఇప్పుడు మనిషి
చెట్టు కావాలి
మంచి మనసు
పరిమళాలు పూయాలి
సమాజ హితమొసగే
మానవత్వ ఫలాలు కాయాలి
కాలుష్యం కల్మషం
పెచ్చుమీరిన వాతావరణంలో
దగాకోరు విషవాయు విహారం నిలువరించి
స్వచ్ఛమైన సహాయకారి
ప్రాణవాయువు ప్రసరించాలి
పరోపకారమే పరమధర్మమని నినదించాలి
ప్రయోజనం లేని ఎడారి గుండెలు కావు
పచ్చటి కారుణ్య హరితం అభివ్యాపించాలి
స్వార్థం ముళ్ళచెట్లు కావు
నిస్తేజపు నిష్క్రియాపర్వపు
కలుపు మొక్కల ఆలవాలం కాదు
దేశహితార్థపు మనిషి
చెట్ల ఆనవాళ్లు మనకు
ఇప్పుడు అవసరం
వంచన లోయల మోసకారులు కాదు
హిమోన్నత శిఖర వ్యక్తిత్వ నాగరికులు
ప్రాదుర్భవించాలి
మనిషి చెట్ల కొరత తీరే
హరితహారం కావాలి
విస్తృతి దృశించాలి
సమాజహిత నినాద సవ్వడి
చేసే మనిషి చెట్లు ఇప్పుడు
మరింత అవశ్యం…
-డాక్టర్ చిట్యాల రవీందర్
77988 91795