చీకటి తెరలను తెంపుతూ
అజ్ఞానాంధకారాన్ని వైదొలిగిస్తూ
వెలుగు రేఖలు కొన్ని
మస్తిష్కపు మలినాన్ని శుద్ధ్ది చేస్తాయి
ఆలోచనల పరంపరలో
నిర్ణయాత్మక భావాన్ని నిలకడ చేసి
సన్మార్గం వైపు నడిపిస్తాయి
సహనంతో సావాసం చేయిస్తూ
నిర్మలత్వానికి స్ఫూర్తి రేఖలౌతాయి
ఆ వెలుగు రేఖల వెలుతురులో
ముసిరిన మబ్భుల మూఢత్వంపై
విజ్ఞత చలువదనాన్ని తెప్పిస్తాయి
వెలుగులో నడిపిస్తూనే
మస్తిష్కాన్ని వెలిగిస్తూ
కండ్లను తెరిపిస్తుంటాయి
వెలుగంటే కంటికి కనిపించే
సహజమైన ప్రకృతి కాదు
లోపాల్ని కొలిచే
నిర్ధిష్టమైన కొలబద్ద
ఆ కాంతి రేఖలు
సమగ్రతకు రూపాన్నిస్తాయి
అసమానతల్ని తొలిగించే
తీర్పు ఔతాయి
అక్షరాలుగా పరిణమిస్తూనే
సులక్షతకు పట్టం కడతాయి
కాంతి రేఖలుగా విస్తరిస్తూనే
ఉషస్సుకు ప్రతీకలౌతాయి