మీ రాజ్యం మీరేలండి

దేశం మళ్లీ హర్షిస్తున్నది జీవితం తిరిగి ఆశలు గొలుపుతున్నది అధికార మదోన్మత్తులను ధిక్కరించి యువత గొంతెత్తుతున్నది

దేశం మళ్లీ హర్షిస్తున్నది
జీవితం తిరిగి ఆశలు గొలుపుతున్నది
అధికార మదోన్మత్తులను ధిక్కరించి
యువత గొంతెత్తుతున్నది

దేశం కారడవిగా మారి
చీకట్లు కమ్ముతుండిన వేళ
పొంచి దూకుతున్న మృగాలు
పంజాలు విసురుతున్న
విష ఘడియలలో

దేశం అనుక్షణం
భయకంపితమవుతుండిన
కాళరాత్రిలో
భూమి అట్టడుగు నుంచి
విశాలాకాశం నుంచి
అష్ట దిక్కుల నుంచి
పంచభూతాల నుంచి
అకస్మాత్తుగా బద్దలవుతున్న ధిక్కారం

కాంతి పుంజాలతో
కళ్లు మిరుమిట్లు గొలుపుతుండగా
ఆసేతు హిమాచలం
మనస్సులను, మేధస్సులను
కంపింపజేస్తుండగా

దేశమంత మళ్లీ హర్షిస్తున్నది
ఆశీర్వదిస్తున్నది
జీవితం తిరిగి ఆశలు గొలుపుతున్నది

వీధుల నేలుతున్న యువతరమా
ఈ దేశం మీదేనండి
మీ రాజ్యం మీరేలండి

టంకశాల అశోక్‌