మది దోచేలా.. గది

ఇల్లు ఎంత విశాలంగా, అందంగా ఉన్నా గోడలకు వేసే పెయింట్‌ను బట్టే కొత్త ఆకర్షణ వస్తుంది. అంతేకాదు, ఆ వర్ణాలు ఇంటి వాతావరణంపైనా ప్రభావం చూపుతాయి. అయితే, చాలామంది తమకు ఇష్టమైన రంగులనే ఎంచుకొంటారు తప్ప, అవి నిజంగా ఇంట్లోని గదులకు నప్పుతాయా లేదా అన్నది ఆలోచించరు. అలాంటి వాళ్లకు, ఏ రూమ్‌లో ఏ పెయింట్‌ వేస్తే బాగుంటుందో నిపుణులు సూచిస్తున్నారు..

లివింగ్‌ రూమ్‌: ఇంటిల్లిపాదీ ఎక్కువ సమయం గడిపేది లివింగ్‌ రూమ్‌లోనే. టీవీ చూసినా, అతిథులతో మాట్లాడినా ఇక్కడే. ఈ గది గోడలకు లేత గోధుమరంగు లేదా బూడిద రంగు బాగుంటాయి.

బాత్‌ రూమ్‌: ఆధునిక బాత్‌రూమ్‌లలో నేలమీద తెల్లటి టైల్స్‌, మార్బుల్స్‌ ఉంటాయి. ఇలాంటప్పుడు గోడలకు ముదురు రంగులు వేస్తే బాగుంటుంది. ఉదాహరణకు బొగ్గు, ఇనుము రంగులు వాడొచ్చు.

కిచెన్‌: వంటగది అంటే ఇంట్లో అందరికీ ఇష్టమే. కిచెన్‌ ట్రెండీగా కనిపించాలంటే, నేవీ బ్లూ ఎంచుకోవాలి. అలాగే, గదిలో ఎక్కువగా ఇత్తడి, రాగి వస్తువులు ఉంటే మరింత కళ వస్తుంది.

డైనింగ్‌ రూమ్‌: అపార్ట్‌మెంట్‌ కల్చర్‌లో ఇంట్లోకి వెలుతురు తక్కువగా వస్తుంటుంది. అందువల్ల డైనింగ్‌ రూమ్‌లోని గోడలకు వైట్‌, క్రీమ్‌ వైట్‌, సెమీ వైట్‌ రంగులను ఎంచుకోవాలి. గోడలపై నచ్చిన సీనరీలు, పెయింటింగ్స్‌ పెట్టుకుంటే ఆ గది మరింత అందంగా మారుతుంది.

కిడ్స్‌ రూమ్‌: పిల్లలకు కేటాయించిన గదులకు, ఆఫీస్‌గా మార్చుకున్న గదులకు
క్యాలమైన్‌ రంగును ఎంచుకోవాలి. లేత గులాబీ వర్ణం కూడా వేసుకోవచ్చు.