పిల్లలకు ఐస్‌క్రీమ్‌ అమ్మనందుకు.. స్టాక్‌ మొత్తం ధ్వంసం చేశాడు

ముంబై: పిల్లలకు ఐస్‌క్రీమ్‌ అమ్మనందుకు ఆగ్రహించిన ఒక వ్యక్తి ఆ షాపు బయట ఉన్న ఐస్‌క్రీమ్‌ స్టాక్‌ మొత్తాన్ని ధ్వంసం చేశాడు. మహారాష్ట్ర రాజధాని ముంబైలో ఈ ఘటన జరిగింది. ఈ నెల 19న తెల్లవారుజామున 2.11 గంటలకు ఒక వ్యక్తి తన పిల్లలతో కలిసి వసాయ్‌లోని కౌల్ హెరిటేజ్ సిటీ ప్రాంతానికి వెళ్లాడు. అక్కడున్న మెడికల్‌ షాపు బయట ఉన్న ఐస్‌క్రీమ్‌ కావాలని పిల్లలు అడిగారు. అయితే వాటిని అమ్మేందుకు షాపు వ్యక్తి నిరాకరించాడు. మధ్య రాత్రి వేళ కావడంతో గ్రిల్‌ వేసి ఉన్న షాపు నుంచి బయటకు వచ్చి ఐస్‌క్రీమ్‌లు తీసి ఇవ్వడం ఇష్టం లేక ఇలా బదులిచ్చాడు.

దీంతో ఇద్దరు పిల్లలతో ఉన్న వ్యక్తి షాపు యజమానితో వాదనకు దిగాడు. అనంతరం అక్కడున్న శానిటైజర్‌ ఇనుప స్టాండ్‌తో ఆ షాపు యజమానిని బెదిరించాడు. అంతటితో ఆగక బయట ఫ్రిజ్‌లలో ఉన్న ఐస్‌క్రీమ్‌ స్టాక్‌ను శానిటైజర్‌ ఇనుప స్టాండ్‌తో ధ్వంసం చేశాడు. అనంతరం దానిని అక్కడే పడేసి వెళ్లిపోయాడు.

కాగా, ఎదురుగా ఉన్న ఒక మెడికల్‌ షాపులోని సీసీటీవీలో ఇది రికార్డు అయ్యింది. దీంతో ఈ వీడియో సోషల్‌ మీడియాలో వైరల్‌ అయ్యింది. ఫిర్యాదు అందుకున్న పోలీసులు కేసు నమోదు చేశారు. ఆ వ్యక్తి కోసం గాలిస్తున్నారు.

https://youtu.be/xmWCjiv8RHs