Indian Movies | కొత్త సినిమాలు శుక్ర‌వారం మాత్ర‌మే ఎందుకు రిలీజ్ అవుతాయి?

సంక్రాంతి, ఉగాది, ద‌స‌రా ఇలా ప్ర‌తి పండుగ ఏడాదికి ఒక‌సారి వ‌స్తుంది. అయితే సినీ ప్రేమికులకు మాత్రం ప్ర‌తి శుక్ర‌వారం ఒక పండుగే. భాష ఏదైనా కాని శుక్ర‌వారం మాత్ర‌మే సినిమాలు విడుద‌ల‌వుతుంటాయి. శుక్ర‌వారం వ‌స్తుందంటే చాలు సినీ అభిమానులు థియేట‌ర్ల‌కు ప‌రుగులు తీస్తుంటారు. ఆదివారం కాకుండా శుక్ర‌వారం ప‌బ్లిక్ హాలీడే ఉంటే బావుండేది క‌దా అని ఎంతో మంది సినీ ప్రేక్ష‌కులు అనుకుంటుంటారు. అస‌లు శుక్ర‌వారం మాత్రేమే సినిమాలు ఎందుకు విడుద‌ల‌వుతాయి? ఇత‌ర రోజుల‌లో ఎందుకు విడుద‌ల కావు? అనే ప్ర‌శ్న కూడా ప్ర‌తి ప్రేక్ష‌కుడి మ‌దిలో తిరుగుతూ ఉంటుంది.

సినిమా.. హాలీవుడ్‌లో రూపొంది, అక్క‌డే తొలి థియేట‌ర్‌ ప్ర‌ద‌ర్శ‌న జ‌రుపుకుంది. శుక్ర‌వారం రోజునే సినిమాను విడుద‌ల చేయాల‌నే సంస్కృతిని హాలీవుడ్‌లోనే మొద‌లు పెట్టారు. అయితే మొద‌ట్లో హాలీవుడ్‌లో ఏ రోజు ప‌డితే ఆ రోజు సినిమాలు విడుద‌ల‌య్యేవి. కానీ క‌లెక్ష‌న్లు మాత్రం ఎక్కువ‌గా వ‌చ్చేవి కావు. దాంతో హాలీవుడ్ మేక‌ర్స్ చర్చించుకుని శుక్ర‌వారం మాత్ర‌మే క‌రెక్ట్ అని నిర్ణ‌యించుకుని శ్రీకారం చుట్టారు. ఆ రోజే ఎందుకు అంటే హాలీవుడ్‌లో శుక్ర‌వారం వేత‌నాలు ఇచ్చే రోజు. సోమ‌వారం నుండి శుక్ర‌వారం వ‌రకు ప‌నిచేయించుకుని శుక్ర‌వారం జీతం ఇచ్చి శ‌ని, ఆదివారాలు సెల‌వులు ఇచ్చేవారు. ఈ నేపథ్యంలో శుక్ర‌వారం సాయంత్రం వేత‌నం రాగానే నేరుగా థియేట‌ర్ల‌కు వ‌స్తార‌ని ఆ రోజే సినిమాలు విడుద‌ల చేసేశారు. ఇక ఆ మ‌రుస‌టి రెండు రోజులు శ‌ని, ఆదివారం ఎలాగూ హాలీడేస్ కావ‌డంతో మూడు రోజులు క‌లెక్ష‌న్లు బాగా వ‌చ్చేవ‌ట‌. హాలీవుడ్‌లో అలా శుక్ర‌వారం విడులైన మొద‌టి సినిమా ‘గాన్ విత్ ది విండ్’. 1939లో డిసెంబ‌ర్ 15న ఈ చిత్రం విడుద‌లైంది.

ప్ర‌స్తుతం ఈ ప‌ద్థతినే ఇండియాలో కూడా పాటిస్తున్నారు. అయితే ఈ ప‌ద్ద‌తి ఇండియాలో మొద‌ట్లో అంతగా పాటించ‌లేరు. సీనియ‌ర్ న‌టుడు రాజ్ క‌పూర్ హీరోగా న‌టించిన ‘నీల్ క‌మ‌ల్’ చిత్రం సోమ‌వారం విడుద‌లైంది. తెలుగులో ‘పాతాళ‌భైర‌వి’, ‘మాయ‌బ‌జార్’ వంటి సినిమాలు కూడా శుక్ర‌వారం విడుద‌ల కాలేదు. అయితే ఈ సంప్ర‌దాయం బాలీవుడ్‌లో 1960లో వ‌చ్చిన ‘మొఘ‌ల్ ఎ అజ‌మ్’ సినిమాతో మొద‌లైంది. ఇక అప్ప‌టి నుండి ఇండియాలో కూడా సినిమాలు శుక్ర‌వారం మాత్ర‌మే విడుద‌లవుతూ వ‌స్తున్నాయి. ఇదే కాకుండా శుక్ర‌వారం సినిమాలు విడుద‌ల కావ‌డానికి మ‌రో కార‌ణం కూడా ఉంద‌ట‌.

భార‌త‌దేశంలో శుక్ర‌వారాన్ని ల‌క్ష్మీ దేవ‌త రోజుగా ప‌రిగ‌ణిస్తారు. చాలా మంది శుక్ర‌వారాన్ని శుభ సూచికంగా భావిస్తుంటారు. ఈ నేప‌థ్యంలో నిర్మాత‌ల‌కు శుక్ర‌వారం మంచి లాభాలు వ‌స్తాయిని భావించి సినిమాల‌ను విడుద‌ల చేస్తున్నారు. అయితే ఇందులో క‌మ‌ర్షియ‌ల్ కోణం కూడా ఉంద‌ట‌. అదేంటంటే శుక్ర‌వారం రోజు మ‌ల్టీప్లెక్స్ రెంట్ మిగితా రోజుల కంటే త‌క్కువ‌గా ఉంటుందట‌. ఈ క్ర‌మంలో నిర్మాత‌లు మ‌ల్టీపెక్స్ య‌జ‌మానుల‌కు శుక్ర‌వారం త‌క్క‌వ రెంట్‌ను పే చేస్తార‌ట‌. అయితే ఇప్పుడు సినిమాలు కేవ‌లం శుక్ర‌వారం మాత్ర‌మే విడుద‌ల కావ‌డంలేదు. గురువారం కూడా విడుద‌ల‌వుతున్నాయి. ఈ మ‌ధ్య కాలంలో కొన్ని సినిమాలు బుధ‌వారం కూడా విడుద‌ల‌య్యాయి.