‘ఎఫ్ 3’ చిత్రాన్ని క్లాస్, మాస్, పిల్లలు, యువత ఇలా అన్ని వర్గాల ప్రేక్షకులు ఇష్టపడుతున్నారని, మొదటి ఆట నుంచే సూపర్ హిట్ టాక్ వచ్చిందని చెబుతున్నారు నిర్మాత దిల్ రాజు. ఆయన సమర్పణలో శిరీష్ నిర్మించిన ఈ సినిమా తాజాగా ప్రేక్షకుల ముందుకొచ్చింది. వెంకటేష్, వరుణ్ తేజ్, తమన్నా, మెహరీన్ ప్రధాన పాత్రల్లో నటించారు. దర్శకుడు అనిల్ రావిపూడి తెరకెక్కించారు. ఈ సినిమా విజయోత్సవాన్ని హైదరాబాద్లోని సంస్థ కార్యాలయంలో నిర్వహించారు. హీరో వెంకటేష్ మాట్లాడుతూ..‘ పాండమిక్లో యూత్, మాస్ మాత్రమే థియేటర్లకు వచ్చేవారు. మేం కుటుంబ ప్రేక్షకులను థియేటర్లకు తీసుకురావాలనే లక్ష్యంతో సినిమా చేశాం. ఇవాళ మా అంచనా నిజమైంది’ అన్నారు. నిర్మాత దిల్ రాజు మాట్లాడుతూ…‘ఉదయం నుంచీ సినిమా బ్లాక్ బస్టర్ అనే టాక్ వస్తున్నది. వెంకటేష్, వరుణ్ తేజ్లతో మా సంస్థకు హ్యాట్రిక్ విజయం దక్కింది. ఓవర్సీస్ నుంచి కూడా మంచి స్పందన వస్తున్నది’ అన్నారు. ‘చిత్రబృందం అంతా రెండేళ్లు ఒక కుటుంబంలా కలిసి పనిచేశాం. ఇమేజ్ ఉన్న హీరోలతో కామెడీ పండించడం సంతోషంగా ఉంది’ అన్నారు దర్శకుడు అనిల్ రావిపూడి.