జీవితాంతం అదే పంథాలో కొనసాగుతా

విధిని బలంగా విశ్వసిస్తారు అగ్ర హీరో వెంకటేష్‌. ఏ రంగంలో ఉన్నా నిజాయితీగా పనిచేయాలని, ఫలితం గురించి ఏమాత్రం ఆలోచించొద్దని చెబుతుంటారు. ఆయనతో ఇంటర్వ్యూ అంటే ఆద్యంతం సరదాగా, అక్కడక్కడా ఆధ్యాత్మిక అంశాల చర్చతో సాగిపోతుంది.

విధిని బలంగా విశ్వసిస్తారు అగ్ర హీరో వెంకటేష్‌. ఏ రంగంలో ఉన్నా నిజాయితీగా పనిచేయాలని, ఫలితం గురించి ఏమాత్రం ఆలోచించొద్దని చెబుతుంటారు. ఆయనతో ఇంటర్వ్యూ అంటే ఆద్యంతం సరదాగా, అక్కడక్కడా ఆధ్యాత్మిక అంశాల చర్చతో సాగిపోతుంది. ఆయన నటించిన 75వ చిత్రం ‘సైంధవ్‌’ ఈ నెల 13న ప్రేక్షకుల ముందుకురానుంది. శైలేష్‌ కొలను దర్శకుడు. ఈ సందర్భంగా గురువారం వెంకటేష్‌ పాత్రికేయులతో ప్రత్యేకంగా ముచ్చటించారు. ఆ విశేషాలివి..

• నా దృష్టిలో 75 అనేది ఓ నెంబర్‌ మాత్రమే. అందుకే ఈ సినిమా విషయంలో ఏమాత్రం ఒత్తిడిగా ఫీలవలేదు. ఆ సమయానికి మన వద్దకు వచ్చిన అవకాశాలను సద్వినియోగం చేసుకొని నిజాయితీగా కష్టపడాలన్నదే నా తత్వం. ప్రతీ సినిమా నాకు ప్రత్యేకమే. కెరీర్‌లో ఇంకా చాలా దూరం ప్రయాణించాల్సి ఉంది.
• ‘సైంధవ్‌’ కథలో మనసును కదిలించే డాటర్‌ సెంటిమెంట్‌ ఉంటుంది. తండ్రీ కూతురు అనుబంధం నేపథ్యంలో వచ్చే సన్నివేశాలు ఎమోషనల్‌గా సాగుతాయి. యాక్షన్‌ ఘట్టాలు చాలా సహజంగా అనిపిస్తాయి. రేసీ స్క్రీన్‌ప్లేతో ఈ సినిమా సాగుతుంది. ఇప్పటివరకు ఇలాంటి బ్యాక్‌డ్రాప్‌లో నేను సినిమా చేయలేదు.
• ఈ సినిమా ైక్లెమాక్స్‌ను అద్భుతంగా డిజైన్‌ చేశారు. పతాక ఘట్టాల్లో వచ్చే సన్నివేశాలన్నీ ఉద్వేగాల్ని పంచుతాయి. యాక్షన్‌ సీక్వెన్స్‌ కూడా మునుపెన్నడూ చూడని రీతిలో ఉంటుంది. ఈ అంశాలన్నీ సినిమాకు ఓ కొత్తదనాన్ని తీసుకొచ్చాయి.
• ‘ధర్మచక్రం’ సినిమాతో ‘సైంధవ్‌’కు ఎలాంటి పోలిక ఉండదు. రెండూ పూర్తి విభిన్నమైన చిత్రాలు. ఈ సినిమాలో నవాజుద్దీన్‌ సిద్ధిఖీతో కలిసి పనిచేయడం గొప్ప అనుభూతినిచ్చింది. ఆయన విలక్షణ నటుడు. ఈ సినిమాలో అద్భుతమైన పర్‌ఫార్మెన్స్‌ కనబరిచాడు.
• ఈ సినిమా కోసం దర్శకుడు శైలేష్‌ ‘ఇంద్రప్రస్థ’ అనే ఫిక్షనల్‌ సిటీని సృష్టించాడు. మాఫియా, డ్రగ్స్‌, గన్‌ కల్చర్‌ కలబోతగా ఆ నగర సెటప్‌ మొత్తం హాలీవుడ్‌ సినిమా తరహాలో ఉంటుంది. ఇక సంతోష్‌ నారాయణ సందర్భోచితంగా చక్కటి పాటలిచ్చారు. బ్యాక్‌గ్రౌండ్‌ మ్యూజిక్‌ కథలోని ఫీల్‌ను క్యారీ చేస్తుంది.
• 75 సినిమాల ప్రయాణంలో ఎక్కడా ఒక్క వివాదం లేకుండా ఎలా ఉన్నారని చాలా మంది నన్ను అడుగుతున్నారు. నిజంగా ఆ విషయం నాకు తెలియదు (నవ్వుతూ). చిన్నతనం నుంచే ఎవరినీ ఇబ్బంది పెట్టకుండా, అసౌకర్యం కలిగించకుండా ఉండాలనే మనస్తత్వం నాది. జీవితాంతం అదే పంథాలో సాగుతాను.
• ‘స్వామి వివేకానంద’ స్క్రిప్ట్‌ ఓ లెవల్‌ వరకు వచ్చింది. ఇద్దరు మేకర్స్‌ చేస్తున్నారు. అయితే స్క్రిప్ట్‌ ఇంకా పూర్తి సంతృప్తిగా రాలేదు. నా తదుపరి సినిమా ఇంకా ఖరారు కాలేదు. రెండు మూడు కథలు చర్చల దశలో ఉన్నాయి. త్వరలో ఆ వివరాలను వెల్లడిస్తా.