Visit:
The Paradise | నేచురల్ స్టార్ నాని, దర్శకుడు శ్రీకాంత్ ఓదెల కాంబినేషన్లో తెరకెక్కిన భారీ చిత్రం ‘ది ప్యారడైజ్’ కోసం అభిమానులు, సినీ ప్రేక్షకులు ఎంతో ఆసక్తిగా ఎదురుచూస్తున్నారు. ఇప్పటికే ఈ సినిమాపై భారీ అంచనాలు నెలకొనగా.. తాజాగా ప్రారంభమైన అడ్వాన్స్ బుకింగ్స్కు వచ్చిన స్పందన ఆ అంచనాలను మరింత పెంచుతోంది. ఈ చిత్రం ఈ గురువారం ప్రేక్షకుల ముందుకు రానుంది. సినిమా విడుదలకు ముందే అడ్వాన్స్ టికెట్ బుకింగ్స్ ప్రారంభం కావడంతో నాని అభిమానులు థియేటర్లలో సినిమాను చూసేందుకు పోటీ పడుతున్నారు. ముఖ్యంగా నైజాం ప్రాంతానికి సంబంధించిన అడ్వాన్స్ బుకింగ్స్ను డిస్ట్రిక్ట్ యాప్లో గత రాత్రి ప్రారంభించారు. బుకింగ్స్ ఓపెన్ అయిన వెంటనే ప్రేక్షకులు భారీగా టికెట్లు బుక్ చేసుకోవడంతో చాలా షోలు వేగంగా నిండిపోయినట్లు చిత్రబృందం వెల్లడించింది.
అడ్వాన్స్ బుకింగ్స్ ప్రారంభమైన కొద్ది సమయంలోనే రూ.1 కోటికి పైగా వసూళ్లు నమోదైనట్లు సమాచారం. అంతేకాకుండా లక్షకు పైగా టికెట్లు అమ్ముడైనట్లు తెలుస్తోంది. విడుదలకు ఇంకా సమయం ఉండగానే ఈ స్థాయిలో స్పందన రావడం ‘ది ప్యారడైజ్’పై ఉన్న ఆసక్తిని తెలియజేస్తోంది. మిగిలిన ప్రాంతాల్లోనూ పూర్తి స్థాయి అడ్వాన్స్ బుకింగ్స్ త్వరలోనే ప్రారంభం కానున్నాయి. ఇక సినిమాకు సంబంధించిన ప్రమోషన్స్ కూడా జోరుగా సాగుతున్నాయి. హైదరాబాద్లోని శిల్పకళా వేదికలో ఈరోజు ‘ది ప్యారడైజ్’ ప్రీ-రిలీజ్ వేడుకను ఘనంగా నిర్వహించనున్నారు. ఈ కార్యక్రమంలో చిత్రబృందం ఒక ప్రత్యేక సర్ప్రైజ్ను సిద్ధం చేసినట్లు ఇప్పటికే ప్రకటించింది. దీంతో ప్రీ-రిలీజ్ ఈవెంట్పై కూడా అభిమానుల్లో ఆసక్తి నెలకొంది.
‘దసరా’ తర్వాత నాని, శ్రీకాంత్ ఓదెల కాంబినేషన్లో వస్తున్న సినిమా కావడంతో ‘ది ప్యారడైజ్’పై మొదటి నుంచే భారీ అంచనాలు ఉన్నాయి. ఈసారి కూడా దర్శకుడు శ్రీకాంత్ ఓదెల విభిన్నమైన కథ, బలమైన పాత్రలు, యాక్షన్ అంశాలతో సినిమాను తెరకెక్కించినట్లు తెలుస్తోంది. నాని గత చిత్రాలకు భిన్నమైన లుక్, పాత్రలో కనిపించనుండటంతో అభిమానుల్లో ఆసక్తి మరింత పెరిగింది. ఈ సినిమాలో నానికి జోడీగా కయాదు లోహర్ నటిస్తోంది. విలన్ పాత్రలో సీనియర్ నటుడు మోహన్ బాబు కనిపించనున్నారు. రాఘవ్ జుయల్, తనికెళ్ల భరణి, సోనాలి కులకర్ణి తదితరులు కీలక పాత్రల్లో నటించారు. సినిమాలో ప్రతి పాత్రకు ప్రాధాన్యత ఉంటుందని చిత్రబృందం చెబుతోంది. సంగీత సంచలనం అనిరుధ్ రవిచందర్ సినిమాకు పాటలతో పాటు నేపథ్య సంగీతాన్ని అందించారు. అనిరుధ్ సంగీతం కూడా సినిమాకు ప్రధాన ఆకర్షణల్లో ఒకటిగా నిలుస్తుందని అభిమానులు భావిస్తున్నారు.
