ఓ అభిమానిలా పనిచేశా!

‘నేను ఫస్ట్‌టైమ్‌ కలిసి పనిచేసిన హీరోలందరి సినిమాలు భారీ విజయాలు సాధించాయి. ఇప్పుడు మెగాస్టార్‌ చిరంజీవిగారితో చేసిన ‘గాడ్‌ఫాదర్‌' బ్లాస్‌బస్టర్‌ హిట్‌కావడంతో ఆ సెంటిమెంట్‌ మళ్లీ నిజమైంది’ అన్నారు ప్రముఖ సంగీత దర్శకుడు తమన్‌.

‘నేను ఫస్ట్‌టైమ్‌ కలిసి పనిచేసిన హీరోలందరి సినిమాలు భారీ విజయాలు సాధించాయి. ఇప్పుడు మెగాస్టార్‌ చిరంజీవిగారితో చేసిన ‘గాడ్‌ఫాదర్‌’ బ్లాస్‌బస్టర్‌ హిట్‌కావడంతో ఆ సెంటిమెంట్‌ మళ్లీ నిజమైంది’ అన్నారు ప్రముఖ సంగీత దర్శకుడు తమన్‌. ఇటీవల విడుదలైన ‘గాడ్‌ఫాదర్‌’ చిత్రానికి ఆయన సంగీతాన్నందించారు. చిరంజీవి కథానాయకుడిగా మోహన్‌రాజా దర్శకత్వంలో రూపొందిన ఈ చిత్రం ఇటీవలే ప్రేక్షకుల ముందుకొచ్చింది. ఈ సందర్భంగా తమన్‌ పాత్రికేయులతో ముచ్చటించారు…

ఈ సినిమా కోసం నేనూ, దర్శకుడు మోహన్‌రాజా ఏడాది పాటు కష్టపడ్డాం. సంగీతానికి అంతగా ప్రాధాన్యతలేని ఓ సీరియస్‌ కథాంశంలో మ్యూజిక్‌కు పెద్దపీట వేయడం సవాలుగా అనిపించింది. సినిమా కథాంశం, చిరంజీవిగారి పాత్ర తాలూకు పవర్‌ను చూపించేలా యూనివర్సల్‌ బాస్‌ ఫీలింగ్‌తో సౌండ్‌ డిజైన్‌ చేశాం. లండన్‌లోని ఫేమస్‌ అబేయ్‌ రోడ్‌ స్టూడియోస్‌లో ఈ సినిమా బ్యాక్‌గ్రౌండ్‌ స్కోర్‌ చేశాం. అక్కడ రికార్డింగ్‌ జరుపుకున్న తొలి ఇం డియన్‌ సినిమా ‘గాడ్‌ఫాదర్‌’ కావడం విశేషం.

ఆ ప్రశంస మర్చిపోను

చిరంజీవిగారు ఓ మహావృక్షం. ఆయనకు ఎంత క్వాలిటీతో మ్యూజిక్‌ ఇచ్చినా ఇంకా తక్కువే అనిపిస్తుంటుంది. అందుకే నెక్ట్స్‌ లెవల్‌లో సంగీతం ఉండాలని టీమ్‌ అంతా శ్రమించాం. ఈ సినిమా కోసం నేను ఓ మ్యూజిషియన్‌గా కంటే చిరంజీవిగారి అభిమానిగా పనిచేశా. ‘నజభజజజరా..’ అనే పాటతో ఫైట్‌ సీక్వెన్స్‌ చేశాం. పవర్‌ఫుల్‌గా సాగే ఈ పాటను ప్రేక్షకులు బాగా ఎంజాయ్‌ చేస్తున్నారు. ఈ సినిమా విషయంలో చిరంజీవిగారు ఇచ్చిన కాంప్లిమెంట్స్‌ జీవితంలో మర్చిపోలేను. దర్శకుడు శంకర్‌గారు ఫోన్‌ చేసి మ్యూజిక్‌ బాగుందని అభినందించారు. మణిశర్మ, కోటిగారు కూడా ఫోన్‌ చేసి మెచ్చుకున్నారు. నాతో కలిసి ఓ కమర్షియల్‌ సినిమా చేస్తానని చిరంజీవిగారు మాటిచ్చారు. ‘గాడ్‌ఫాదర్‌’ విజయం నా కెరీర్‌లో ఎప్పటికీ గుర్తుండిపోతుంది.