అతని ప్రేమలో ఉన్నా!

డెన్మార్క్‌ బ్యాడ్మింటన్‌ ఆటగాడు మాథిస్‌ బోతో తాప్సీ ప్రేమాయణం గురించి అప్పట్లో అనేక వార్తలొచ్చాయి. అయితే తాప్సీ మాత్రం తన లవ్‌ఎఫైర్‌పై ఎప్పుడూ పెదవి విప్పలేదు. దాంతో ఈ జంట ప్రేమకథ ముగిసిపోయిందని అందరూ భావించారు.

డెన్మార్క్‌ బ్యాడ్మింటన్‌ ఆటగాడు మాథిస్‌ బోతో తాప్సీ ప్రేమాయణం గురించి అప్పట్లో అనేక వార్తలొచ్చాయి. అయితే తాప్సీ మాత్రం తన లవ్‌ఎఫైర్‌పై ఎప్పుడూ పెదవి విప్పలేదు. దాంతో ఈ జంట ప్రేమకథ ముగిసిపోయిందని అందరూ భావించారు. తాజాగా ఈ విషయంపై తొలిసారిగా తన మనసులో మాటను బయటపెట్టింది తాప్సీ. దాదాపు పదేళ్ల నుంచి మాథిస్‌ బోతో ప్రేమలో ఉన్నానని చెప్పింది. ‘దక్షిణాది నుంచి బాలీవుడ్‌లో అడుగుపెట్టిన తొలినాళ్లలోనే అతడితో పరిచయమైంది. ఇన్నేళ్ల కాలంలో మా బంధం మరింతగా బలపడుతూ వచ్చింది.

అయితే మా ప్రేమ వ్యవహారం గురించి ఇప్పటివరకు నేను ఎక్కడా మాట్లాడలేదు. ప్రేమ, పెళ్లి విషయంలో నాకు కొన్ని నిశ్చితాభిప్రాయాలున్నాయి. మాథిస్‌ బోతో నేను చాలా సంతోషంగా ఉన్నా. బ్రేకప్‌ చెప్పేసి మరో బంధంలో అడుగుపెట్టాలనే ఆలోచన ఏ రోజూ రాలేదు’ అని చెప్పుకొచ్చింది తాప్సీ. గత ఏడాది ఈ భామకు బాగా కలిసొచ్చింది. షారుఖ్‌ఖాన్‌తో జోడీగా ఆమె నటించిన ‘డంకీ’ చిత్రం భారీ విజయాన్ని సొంతం చేసుకుంది. తాప్సీ నటనకు మంచి మార్కులు పడ్డాయి. ఈ సక్సెస్‌ జోష్‌లో తదుపరి సినిమాల కోసం సన్నద్ధమవుతున్నది తాప్సీ. ప్రస్తుతం ఆమె బాలీవుడ్‌లో నాలుగు చిత్రాల్లో నటిస్తూ బిజీగా ఉంది.