Visit:
System Trailer | వెండితెరపై వైవిధ్యమైన పాత్రలతో మెప్పించే సీనియర్ నటి జ్యోతిక, బాలీవుడ్ భామ సోనాక్షీ సిన్హా కలిసి నటిస్తున్న తాజా మూవీ ‘సిస్టమ్’ (System). నేరుగా ఓటీటీ వేదికగా విడుదలకు సిద్ధమవుతున్న ఈ చిత్రంపై ప్రేక్షకుల్లో భారీ అంచనాలు నెలకొన్నాయి. ప్రముఖ ఓటీటీ సంస్థ ‘అమెజాన్ ప్రైమ్ వీడియో’లో మే 22 నుంచి ఈ సినిమా తెలుగుతో పాటు ఇతర భాషల్లోనూ స్ట్రీమింగ్ కానుంది. ఈ సందర్భంగా మంగళవారం ట్రైలర్ను విడుదల చేసింది చిత్రయూనిట్.
ఈ ట్రైలర్ చూస్తుంటే.. సమాజంలోని రెండు వేర్వేరు ధృవాలకు చెందిన మహిళలు న్యాయం కోసం ఏకమైతే ఎలా ఉంటుందనేదే ఈ చిత్ర ప్రధానాంశం. నేహా రాజవంశ్ (సోనాక్షీ సిన్హా) వ్యవస్థలోని లోపాలను ఎండగట్టే ధైర్యవంతురాలైన పబ్లిక్ ప్రాసిక్యూటర్గా కనిపించనుంది. సారిక (జ్యోతిక) సామాన్య జీవితం గడిపే ఓ స్టెనోగ్రాఫర్గా, తనదైన శైలిలో న్యాయం కోసం పోరాడే పాత్రలో జ్యోతిక పరకాయ ప్రవేశం చేశారు. అన్యాయంపై ఆశయం సాధించిన విజయమే ఈ ‘సిస్టమ్’. అధికారం, వ్యవస్థలోని లోతుపాతుల చుట్టూ తిరిగే ఈ కథలో ప్రముఖ దర్శకుడు అశుతోష్ గోవారికర్, గౌరవ్ పాండే కీలక పాత్రలు పోషించారు. విభిన్నమైన కథాంశాలను తెరకెక్కించడంలో దిట్ట అయిన అశ్వినీ అయ్యర్ తివారీ ఈ చిత్రానికి దర్శకత్వం వహించారు. మే 22న స్ట్రీమింగ్ కానున్న ఈ చిత్రం, ఓటీటీ ప్రియులకు ఒక సరికొత్త క్రైమ్ డ్రామా అనుభూతిని ఇస్తుందని చిత్ర యూనిట్ ధీమా వ్యక్తం చేస్తోంది.
