ప్రేమబంధానికి ముగింపు

మూడేళ్ల ప్రేమాయణానికి వీడ్కోలు పలికింది బాలీవుడ్‌ నటి సుస్మితాసేన్‌. ప్రియుడు రోహ్మన్‌ శావల్‌తో తన అనుబంధం ముగిసినట్లుగా ఆమె ప్రకటించింది. రోహ్మన్‌తో సన్నిహితంగా ఉన్న ఓ ఫొటోను ఇన్‌స్టాగ్రామ్‌ ఖాతాలో పోస్ట్‌ చేసిన సుస్మితాసేన్‌ ‘స్నేహితులుగా మా అందమైన ప్రయాణం మొదలైంది. ఇకపై స్నేహితులుగానే కొనసాగుతాం. ఎన్నో మధురానుభూతులను మిగ్చిలిన మా సుదీర్ఘప్రణయబంధానికి ముగింపు పలుకుతున్నాం’ అని పేర్కొన్నది. నో మోర్‌ స్పెక్యులేషన్స్‌ అనే హ్యాష్‌ట్యాగ్‌ను జోడించింది. రోహ్మన్‌తో విడిపోవడానికి గల కారణాల్ని మాత్రం సుస్మితాసేన్‌ వెల్లడించలేదు. తనకన్నా వయసులో పదిహేనేళ్లు చిన్నవాడైన రోహ్మన్‌తో సుస్మితకు 2018లో ఏర్పడిన పరిచయం ప్రేమగా మారింది. సుస్మిత సినిమా ప్రచార కార్యక్రమాలతో పాటు కుటుంబ వేడుకల్లో రోహ్మన్‌ చాలా సార్లు కనిపించారు. మనస్పర్థలతోనే వీరు విడిపోయినట్లుగా సమాచారం. ‘ఆర్య’ వెబ్‌సిరీస్‌లో గృహిణిగా జీవితాన్ని మొదలుపెట్టి మాఫియాడాన్‌గా మారిన మహిళగా సుస్మితాసేన్‌ నటనకు మంచి పేరు వచ్చింది