రోలెక్స్‌కు లైన్‌ క్లియర్‌

తమిళ అగ్ర హీరో సూర్య ప్రస్తుతం పీరియాడిక్‌ యాక్షన్‌ ఫిల్మ్‌ ‘కంగువ’ చిత్రీకరణలో బిజీగా ఉన్నారు. ఈ సినిమా అనంతరం వెట్రిమారన్‌ దర్శకత్వంలో జల్లికట్టు నేపథ్య కథాంశంతో తెరకెక్కనున్న ‘వాడి వసల్‌' చిత్రంలో నటించబోతున్నారు.

తమిళ అగ్ర హీరో సూర్య ప్రస్తుతం పీరియాడిక్‌ యాక్షన్‌ ఫిల్మ్‌ ‘కంగువ’ చిత్రీకరణలో బిజీగా ఉన్నారు. ఈ సినిమా అనంతరం వెట్రిమారన్‌ దర్శకత్వంలో జల్లికట్టు నేపథ్య కథాంశంతో తెరకెక్కనున్న ‘వాడి వసల్‌’ చిత్రంలో నటించబోతున్నారు. అయితే లోకేష్‌ కనకరాజ్‌ దర్శకత్వంలో కూడా సూర్య ఓ చిత్రానికి గ్రీన్‌ సిగ్నల్‌ ఇచ్చారని వార్తలొచ్చాయి. లోకేష్‌ కనకరాజ్‌ డైరెక్ట్‌ చేసిన ‘విక్రమ్‌’ చిత్రంలో మాఫియా డాన్‌ రోలెక్స్‌గా సూర్య అతిథి పాత్రకు మంచి గుర్తింపు లభించింది.

ఈ పాత్ర ఆధారంగా ఓ పూర్తి స్థాయి సినిమాకు దర్శకుడు లోకేష్‌ కనకరాజ్‌ సన్నాహాలు చేస్తున్నారని తెలిసింది. ఈ నేపథ్యంలో ఆదివారం ఫ్యాన్స్‌ మీట్‌లో పాల్గొన్న సూర్య ‘రోలెక్స్‌’ చిత్రంపై క్లారిటీ ఇచ్చారు. ఆయన మాట్లాడుతూ “లోకేష్‌ కనకరాజ్‌ దర్శకత్వంలో సినిమా చేయబోతున్నా. రోలెక్స్‌ పాత్ర ఆధారంగా చెప్పిన కథ నాకు బాగా నచ్చింది. నా లైనప్‌లో ఈ సినిమా కూడా ఉంది’ అన్నారు. ఈ వ్యాఖ్యలతో లోకేష్‌ కనకరాజ్‌-సూర్య సినిమా విషయంలో స్పష్టత వచ్చిందని అభిమానులు సంతోషం వ్యక్తం చేస్తున్నారు.