సినిమా ఇండస్ట్రీలో ఎన్నో గొప్ప పాటలకు నృత్యాలను సమకూర్చి, జాతీయ స్థాయిలో గుర్తింపు పొందిన శివ శంకర్ మాస్టర్ కరోనాతో పోరాడుతున్నారు. ఆయనకు ఇలాంటి పరిస్థితి రావడం బాధాకరం అని, ఆయన త్వరగా కోలుకోవాలని కోరుకుంటున్నారు. అయితే ఈ స్టార్ కొరియోగ్రాఫర్ ఊపిరితిత్తులకు 75 శాతం ఇన్ ఫెక్షన్ సోకినట్లు వైద్యులు చెబుతున్నారు. ప్రస్తుతం శివ శంకర్ మాస్టర్ కు వైద్యం అందిస్తుండగా, చికిత్స అందించడం కష్టమవుతోందని ఆయన చిన్న కొడుకు అజయ్ తెలిపారు.
రోజుకు లక్షల రూపాయలు వైద్య ఖర్చుల నిమిత్తం ఖర్చు అవుతోందని, దయచేసి సాయం చేయాలని కోరాడు. ఈ విషయం తెలుసుకున్న రియల్ హీరో సోనూసూద్.. సాయం చేసేందుకు ముందుకు వచ్చాడు. శివశంకర్ కుటుంబసభ్యులతో మాట్లాడారు. ఆయన ప్రాణాలు రక్షించేందుకు అన్నివిధాలుగా ప్రయత్నిస్తున్నట్లు తెలిపారు. ఈ విషయాన్ని ట్విటర్ వేదికగా వెల్లడించాడు. మగధీర చిత్రంలోని ‘ధీర ధీర..’ సాంగ్ ని శివ శంకర్ మాస్టర్ కంపోజ్ చేశారు. ఈ పాటకు జాతీయ అవార్డు దక్కింది. కెరీర్ లో మొదటిసారి మగధీర సినిమాకు జాతీయ అవార్డు గెలుపొందాడు శివ శంకర్ మాస్టర్. ఇండియన్ బ్లాక్ బస్టర్ గా నిలిచిన బాహుబలి చిత్రానికి కూడా శివశంకర్ మాస్టర్ పని చేశారు.