Visit:
తెలుగు సినిమా పాన్‌ ఇండియా స్థాయిలో సత్తా చాటుతున్నది. దీంతో ఇతర భాషల్లోని అగ్ర తారలు సైతం తెలుగు చిత్రాల్లో నటించడానికి ఉత్సాహం చూపిస్తున్నారు. దీపికా పడుకోన్‌, అనన్యపాండే, జాన్వీకపూర్‌ వంటి తారలు ఇప్పటికే తెలుగులో ఎంట్రీ ఇచ్చారు. ఇప్పుడీ వరుసలో సోనాక్షి సిన్హా చేరింది. సూపర్‌ నాచురల్‌ థ్రిల్లర్‌ ‘జటాధర’ చిత్రంతో ఆమె తెలుగులో అరంగేట్రం చేస్తున్నది. సుధీర్‌బాబు హీరోగా వెంకట్‌ కల్యాణ్‌ దర్శకత్వంలో ఈ సినిమా తెరకెక్కుతున్నది.
శనివారం మహిళా దినోత్సవం సందర్భంగా సోనాక్షి సిన్హా లుక్‌ను విడుదల చేశారు. యాక్షన్‌, ఆధ్యాత్మిక, అతీంద్రియ అంశాల కలబోతగా ఓ సరికొత్త ప్రపంచం నేపథ్యంలో ఈ చిత్రాన్ని రూపొందిస్తున్నామని, విజువల్‌ ఎఫెక్ట్స్‌ అబ్బురపరుస్తాయని, ఈ నెల 10 నుంచి సోనాక్షి సిన్హా షూటింగ్‌లో జాయిన్‌ అవుతారని మేకర్స్‌ తెలిపారు. ఈ చిత్రాన్ని జీ స్టూడియోస్‌ పతాకంపై ఉమేష్‌ కెఆర్‌ బన్సాల్‌, ప్రేరణ అరోరా, అరుణ అగర్వాల్‌, శివిన్‌ నారంగ్‌ నిర్మిస్తున్నారు.
