ట్రైన్‌లో దెయ్యం

తారకరత్న, ప్రిన్స్‌, సునీల్‌, అలీ, సాయికుమార్‌ ప్రధాన పాత్రల్లో నటిస్తున్న సినిమా ‘ఎస్‌ 5, నో ఎగ్జిట్‌'.

తారకరత్న, ప్రిన్స్‌, సునీల్‌, అలీ, సాయికుమార్‌ ప్రధాన పాత్రల్లో నటిస్తున్న సినిమా ‘ఎస్‌ 5, నో ఎగ్జిట్‌’. ఈ చిత్రాన్ని శౌరీ ఎంటర్‌టైన్‌మెంట్స్‌ పతాకంపై ఆదూరి ప్రతాప్‌ రెడ్డి, దేవు శ్యామ్యూల్‌, షేక్‌ రహీమ్‌, మెల్కి రెడ్డి గాదె, గౌతమ్‌ కొండెపూడి నిర్మిస్తున్నారు. భరత్‌ కోమలపాటి (సన్నీ) దర్శకుడు. హారర్‌ థ్రిల్లర్‌గా తెరకెక్కిన ఈ సినిమా ఈ నెల 30న విడుదలకు సిద్ధమవుతున్నది. బుధవారం చిత్ర ట్రైలర్‌ విడుదల చేశారు.

ఈ సందర్భంగా దర్శకుడు భరత్‌ కోమలపాటి మాట్లాడుతూ…‘ట్రైన్‌లో జరిగే కథ ఇది. ఎస్‌5 పెట్టెలో ఒక దెయ్యం ప్రయాణికులను ఎలా భయపెట్టింది అనేది ఆసక్తికరంగా ఉంటుంది. సకుటుంబంగా ప్రేక్షకులు చూసేలా రూపొందించాము.’అన్నారు. నటుడు సాయి కుమార్‌ మాట్లాడుతూ..‘ఈ సినిమాలో ఓ మంచి క్యారెక్టర్‌ చేశాను. ఈ చిత్రంతో భరత్‌ దర్శకుడిగా పేరు తెచ్చుకుంటారు’ అన్నారు. ‘ఇది పెద్ద దర్శకులు చేయాల్సిన కథ. ఈ కథను భరత్‌ అందరికీ నచ్చేలా తెరకెక్కించాడు’ అని హాస్య నటుడు అలీ అన్నారు.